پاکستان یېتکرمهلری، طالبان بیلن کېسکینلیک کوچهییشی آرتیدن یوزلب افغانستانلیک مهاجر حبسگه آلیندی.
پاکستان عامهوي اخبارات واسطهلرینینگ خبر بېریشیچه، طالبان بیلن کېسکینلیک و تۉقنهشوولر کوچهیگنیدن سۉنگ، اوشبو مملکت پولیسی یوزلب افغانستانلیک مهاجرلرنی حبسگه آلگن.
دان گزېتهسینینگ خبریگه کۉره، تیناوون (یکشنبه، ۱۰ حوت) پېشاوردهگی محلي محکمه یوزلب افغانستان فقرالرینی محکمه قراری بیلن قماققه یوبارگن.
مذکور نشرنینگ یازیشیچه، بو شخصلر بیر کون اوّل پېشاورنینگ تورلی حدودلریدن قۉلگه آلینگن.
دان «خیبر یۉلی بۉییده جایلشگن کۉپ قبتلی محلي محکمه بناسی اېرتهلبدن باشلب ترتیبسیز منظرهلرگه گواه بۉلدی، چونکه پولیس بۉلیملری تورلی حدودلردن حبسگه آلینگن افغانستانلیک فقرالرینی گروه-گروه قیلیب بو یېرگه آلیب کېلردی» دېب یازگن.
گزېتهنینگ قۉشیمچه قیلیشیچه، حبسگه آلینگنلر سانینینگ کۉپلیگی سببلی اولرنینگ برچهسینی محکمه حدودیگه جایلشتیریش قیین بۉلگن.
پېشاوردهگی محلي محکمه شونینگدېک، عملدهگی ویزه یاکه باشقه قانوني یشش حجتلریگه اېگه بۉلگن یوزلب افغانستان فقرالرینی پولیس حبسیدن آزاد قیلیش تۉغریسیده قرار چیقرگن.
داننینگ یازیشیچه، خیبر پختونخوانینگ کاهات اولسواللیگیده هم پولیس ۱۷۴ نفر افغان قاچقینینی حبسگه آلیب، اولرگه نسبتاً ایش قۉزغهتگچ، قماقخانهگه یوبارگن.
پاکستان پولیسی طالبان بیلن تۉقنهشوولر باشلنگنیدن بویان حجتسیز افغان مهاجرلرینی حبسگه آلیشنی کوچهیتیرگن.
خبرلرگه کۉره، پولیس مملکتنینگ تورلی شهرلریده اویمه-اوی تینتوولر اۉتکزیب، حجتسیز افغان مهاجرلرینی حبسگه آلیب، قماققه جایلهماقده.
