طالبان مطبوعات سۉزلاوچیسی ذبیحالله مجاهدنینگ ایتیشیچه، حاضر هم پاکستاننینگ اوچووچیسیز اوچاقلری افغانستان هوا حدودیده ایلنماقده.
او بوگون (جمعه،8 حوت) قندهارده اۉتکزیلگن مطبوعات انجمنیده پاکستاننی افغانستان هوا فضاسینی بوزیشده عیبلب، اوشبو گروه بونگه جواب بېریشگه مجبور بۉلگنینی ایتدی.
ذبیحالله مجاهد پاکستان بوگون هم پکتیا، پکتیکا، خوست، لغمان و کنر ولایتلریدهگی اَیریم نقطهلرنی بامباردمان قیلگنینی تصدیقلهدی، بیراق اوشبو هجوملرنینگ نشانلری حقیده انیق معلومات بېرمهدی.
اوّلراق محلي منبعلر «اطلاعات روز» گزېتهسیگه پاکستان، جملهدن لغمان ولایتیده طالباننینگ «201 خالد بن ولید» حربي مرکزینی بامباردمان قیلگنی حقیده خبر بېرگن اېدی.
طالبان سۉزلاوچیسی بوگونگی مطبوعات انجمنیده حاضرگچه پاکستان بیلن بۉلگن تۉقنهشوولرده اوشبو گروهنینگ13 نفر اعضاسی هلاک بۉلگنی و ینه22نفری یرهلنگنی حقیده معلوم قیلدی.
او، شونینگدېک، طالبان هجوملری عاقبتیده پاکستاننینگ75 نفر حربيسی هلاک بۉلگنی،48 نفری یرهلنگنی و ینه اَیریملری قۉلگه آلینگنینی دعوا قیلدی.
پاکستان اوردوسی اوّلراق طالبان بیلن بۉلگن تۉقنهشوولرده اوشبو گروهنینگ228 نفر اعضاسی هلاک بۉلگنی و ینه314 نفری یرهلنگنی حقیده ادعا قیلگن اېدی.
شونینگدېک، پاکستان اوردوسی حاضرگچه طالبان بیلن بۉلگن تۉقنهشوولرده پاکستاننینگ12 نفر عسکری هلاک بۉلگنی و ینه27 نفری یرهلنگنی حقیده هم معلوم قیلگن.
طالبان و پاکستان اۉرتهسیدهگی ینگی تۉقنهشوولر کېچه طالبان نینگ پاکستان چېگره پُستهلریگه قرشی جواب هجوملریدن سۉنگ باشلنگن.
اوشبو تۉقنهشوولر اَیریم قۉشنی و منطقه دولتلرینینگ مناسبتیگه سبب بۉلگن.
تورلی دولتلر ایکّی تاماننی هم کېسکینلیکنی کوچهیتیرمسلیککه و معمالرنی ملاقات یۉلی بیلن حل اېتیشگه چقیرماقده.
