افغانستان بۉییچه امریکا اېلچیلیگی طالبان و پاکستان اۉرتهسیدهگی تۉقنهشوولر کوچهیگنیدن خبردار اېکنینی و وضعیتنی یقیندن کوزهتهیاتگنینی بیلدیردی.
اېلچیلیک بوگون (جمعه، ۸ حوت) اعلان قیلگن بیاناتیده امریکا وطنداشلریدن افغانستانگه سفر قیلمسلیکنی، اگر حاضرده اوشبو مملکتده بۉلسهلر، اونی ترک اېتیشنی سۉرهگن.
امریکا اېلچیلیگی اۉز وطنداشلریگه، اگر هوا یۉلی آرقهلی افغانستاندن چیقیش امکانی بۉلمهسه، قوروقلیک آرقهلی تاجیکستان یاکه اۉزبېکستان چېگرهلری آرقهلی چیقیشنی توصیه قیلگن.
شونینگدېک، اېلچیلیک امریکا وطنداشلریگه پاکستان بیلن چېگرهداش حدودلردن اوزاقراق یوریشنی و ایران چېگرهسی آرقهلی افغانستاندن چیقیشگه اورونمسلیکنی مصلحت بېرگن.
طالبان و پاکستان اۉرتهسیدهگی ینگی تۉقنهشوولر کېچه طالباننینگ پاکستان چېگره پُستهلریگه قرشی جواب هجوملری بیلن باشلنگن.
اوشبو تۉقنهشوولردن سۉنگ پاکستان کابل، قندهار، پکتیکا و ینه بیر قطار ولایتلردهگی نشانلرنی بامباردمان قیلگن.
طالبان پاکستاننینگ حربي قرارگاهلریگه دران هجوملری اویوشتیریلگنینی دعوا قیلگن، بیراق پاکستان بو هجوملرنی پاکستان طالبان حرکتی (تیتیپی) بیلن باغلگن.
