بیرلشگن ملتلر تشکیلاتینینگ افغانستاندهگی یاردم ادارهسی (یوناما)نینگ معلوم قیلیشیچه، سۉنگگی ایکّی ییل ایچیده قریب بېش میلیون مهاجر افغانستانگه قَیتگن.
یوناما بوگون (سهشنبه،۵ حوت) فیسبوک صحیفهسیده اعلان قیلگن پُستیده بو جریان قۉشنی دولتلر تامانیدن مجبوري دېپورتلر و قطعي مهاجرت چېکلاولری عاقبتیده یوزهگه کېلگنینی بیلدیرگن.
یونامانینگ قۉشیمچه قیلیشیچه، ۲۰۲۵-ییلده تخمیناً۲.۷۸میلیون مهاجر افغانستانگه قَیتگن۱.۸۸میلیون کیشی ایراندن،۸۹۹مینگ نفری اېسه پاکستاندن.
بیرلشگن ملتلر تشکیلاتینینگ افغانستاندهگی یاردم ادارهسینینگ معلوماتیگه کۉره، قَیتگنلرنینگ۲.۳میلیون نفری رسمي حجتلرگه اېگه بۉلمهگن،۴۸۴ مینگ کیشی اېسه عملدهگی حجتلر بیلن قَیتگن.
یونامانینگ تأکیدلشیچه، بیرلشگن ملتلر تشکیلاتیگه قرهشلی تشکیلاتلر فوقالعاده یاردم کۉرسهتیش بۉییچه موافقلشتیریلگن سعی-حرکتلرنی کوچهیتیرگن، بیراق بحران کۉلمی موجود منبعلر امکانیتیدن انچه آشیب کېتگن.
یوناما حساباتیگه کۉره، مالیوي مبلغلرنینگ کېسکین تنقیصلیگی یاردملرنینگ برچه احتیاجمندلرنی قمرهب آلیشیگه تۉسقینلیک قیلماقده.
یوناما ینه شوندهی یازهدی: عیاللر، قیزلر و بالهلر قۉشیمچه خوف-خطرلرگه دوچ کېلماقده. قَیتیب کېلگنلرنینگ قریب اوچدن بیر قِسمینی عیاللر و قیزلر تشکیل اېتهدی.
۱۷ یاشگچه بۉلگن بالهلر، اینیقسه قراوسیز و عایلهسیدن اجرهلگن بالهلر، زودلیک بیلن حمایه چارهلریگه، عایله اعضالرینی ایزلش خدمتلریگه و روحي-اجتماعي قۉللب-قوّتلشگه محتاج.
بیرلشگن ملتلر تشکیلاتینینگ افغانستاندهگی یاردم ادارهسینینگ قید اېتیشیچه، رسمي حجتلرگه اېگه بۉلمهگن قَیتووچیلر اساسي خدمتلر، تیریکچیلیک امکانیتلری و حقوقي یاردمدن فایدهلنیشده جدّي تۉسیقلرگه دوچ کېلماقده، بو اېسه اولرنی نهایتده ضعیف حالتگه سالیب قۉیماقده.
سۉنگگی ایکّی ییل ایچیده اېران و پاکستان افغانستانگه مهاجرلرنی دېپورت قیلیشنی کوچهیتیریب، کۉپلب یشش حجتلرینی بېکار قیلگن.
بیرلشگن ملتلر تشکیلاتی معلوماتیگه کۉره، مهاجرلرنینگ دېپورت قیلینیشی نتیجهسیده افغانستان اهالیسی قریب 10 فایزگه آشگن و انسانپرورلیک بحرانی ینه-ده چوقورلشگن.
