پاکستان عامهوي اخبارات واسطهلرینینگ خبر بېریشیچه، افغانستان بیلن چېگرهدهگی خیبرپختونخوا ایالتیده پاکستان پولیسی موتریگه اویوشتیریلگن هجومده یېتتی کیشی، جملهدن آلتی پولیسی و بیر تینچ اهالی هلاک بۉلگن ینه تۉرت کیشی جراحتلنگن.
جیونیوز خبریگه کۉره، هجوم بوگون سهشنبه،۵ حوت، «کوهات» اولسواللیگی حدودیده صادر بۉلگن.
خبرگه کۉره، اوچ پولیس واقعه جاییده هلاک بۉلگن، قالگن ایکّی پولیس و بیر تینچ اهالی شفاخانهگه یېتکزیلگنیدن سۉنگ وفات اېتگن.
پاکستان پولیسی هجوم اوزاق حدودده صادر بۉلگنینی و «ترورچیلر» پولیس موترینی اۉققه توتگنینی بیلدیرگن. جراحتلنگنلر شفاخانهگه یېتکزیلگن و دوالنیشی دوام اېتماقده.
پاکستان ایچکی ایشلر وزیری محسن نقوی اوشبو هجومنی «خوارجلر فتنهسی» بیلن ایضاحلهدی بو اتَمه آرقهلی اولر پاکستاندهگی طالبان حرکتینی (تیتیپی) نظرده توتهدی.
اوشبو هجوم افغانستاندهگی طالبان بیلن پاکستان اۉرتهسیده تیتیپینی نظارت قیلیش بۉییچه ضدیت ینه کوچهیگن بیر پیتده صادر بۉلگن.
پاکستان یقینده اسلام آباد، باجور و بنو حدودلریدهگی اۉلیملی هجوملردن سۉنگ شنبه کېچهسی پکتیکا و ننگرهار ولایتلریدهگی یېتّی نقطهنی هوا هجوملری بیلن نشانگه آلگن.
پاکستان اخبارات وزیرلیگی، بو هجوملرده پاکستان طالبان حرکتی و داعشنینگ مرکزی همده یشیرین مسکنلری نشانگه آلینگن.
بیراق طالباننینگ ایتیشیچه، بو هجوملرده بیر دیني مدرسه و تورر جایلر نشانگه آلینگن و ننگرهارده ۱۷ تینچ اهالی، جملهدن ۱۱ باله هلاک بۉلگن.
بیرلشگن ملتلر تشکیلاتینینگ افغانستاندهگی نمایندهلیگی (یوناما) هم بو هجوملرده کمیده ۱۳ تینچ اهالی هلاک بۉلگنینی و ینه ۷ کیشی جراحتلنگنینی تصدیقلهگن.
