(فائو) اوشبو تشکیلاتگه کۉره، شِمال و شمالي-شرقنینگ اَیریم منطقهلریده فقط یېنگیل یاغینگرچیلیکلر پیشبینلیک قیلینماقده، افغانستاننینگ اکثریت منطقهلریده اېسه یاغینگرچیلیک معیاردن پست بۉلهدی.
(فائو) بوگون (دوشنبه، 4 حوت) ایکسدهگی پیامیده ایتیشیچه، معیاردن ایسّیقراق آب-هوا (0،25–4 °c) قارنینگ تېزراق اېریشیگه آلیب کېلهدی و بهارنینگ آخریده سوغاریش اوچون قار ذخیرهلرینی کمهیتیرهدی.
تشکیلاتگه کۉره، مینیمال حرارت شمالي-شرقنینگ بلندراق حدودلریده، شرقده و مرکزي تاغلی حدودلرده هنوز صفر درجهدن پستگه توشیشی ممکن و محلي ساووق اوریشی (موزلش) خوفی سهقلنیب قالهدی.
(فائو)نینگ قۉشیمچه قیلیشیچه، دوام اېتهیاتگن قورغاقچیلیک شمالي للمی دهقانچیلیک منطقهسیده موسم باشیده نملیک تنقیصلیگی خوفینی آشیرهدی.
(فائو) یاغینگرچیلیکنی کوزهتیشده دوام اېتیشینی، للمی قیشلاق خۉجهلیگیده یوز بېرهیاتگن اۉزگریشلر و اولرنینگ قیشلاق اهالیسی تورموشیگه تأثیرینی بهالشینی بیلدیرگن.
افغانستان بیر نېچه ییلدن بېری قورغاقچیلیکنی باشدن کچیرماقده. جاري قیشده معلوم مقدارده قار و یامغیر یاغدی، اما او قورغاقچیلیکنی توگهتیش اوچون یېترلی اېمسدېک کۉرینهدی.
معلوماتگه کۉره، شمالي ولایتلر و مرکزي بلندلیکلرده یاغینگرچیلیک معیاردن کم بۉلگن و بو حدودلر قوروقراق بۉلیب قالگن.
افغانستان نینگ غربي و جَنوبي حدودلریده اېسه یاغینگرچیلیک اَیریم جایلرده معیارگه یقین یاکه معیاردن یوقاری بۉلگن.
شو بیلن بیرگه، هوا حرارتینینگ ایسیشی طفیلی قارنینگ تېزراق اېریشی موسم آخریده قار ذخیرهلری و توپراقنینگ قَیته نملنیشینی کمهیتیریشی ممکن.
