پاکستان حکومتی بوگون اېرته تانگده سۉنگگی خودکوشلیک هجوملریگه جوابن، پاکستان-افغانستان چېگرهسی بۉیلب جایلشگن پاکستان طالبانیگه و اولر بیلن باغلیق بۉلگن یېتّی مرکز همده یشیرین مسکنگه نسبتاً استخبارات معلوماتلریگه اساسلنگن هجوملر عملگه آشیریلگنینی اعلان قیلدی.
بو آرهده طالبان اوشبو هجوملرده ننگرهار و پکتیکا ولایتلریده تورر جایلر همده بیر دیني مدرسه نشانگه آلینگنی، نتیجهده اۉنلب تینچ اهالی، جملهدن عیاللر و بالهلر هلاک بۉلگنینی اَیتماقده.
طالبان مدافعه وزیرلیگی بیاناتیده ایتیلیشیچه، تینچ اهالی و دیني مرکزلرگه قیلینگن هجوملر پاکستان اوردوسینینگ استخبارات و خوفسیزلیکدهگی موفقیتسیزلیکلرینی یقّال کۉرسهتهدی.
بیراق پاکستان اخبارات وزیرلیگی بو عملیاتلر اسلام آباد، باجور و بنو شهرلریده صادر بۉلگن خودکوشلیک پارتلشلریگه جوابن، «انیقلیک و احتیاطکارلیک بیلن» عملگه آشیریلگنینی بیلدیرگن.
وزیرلیکنینگ قۉشیمچه قیلیشیچه، افغانستان توپراغیدن ترورچی گروهلر فایدهلنیشینینگ آلدینی آلیش بۉییچه طالبان رسميلریدن بیر نېچه بار انیق و اثباتلنهدیگن چارهلر کۉریش سۉرهلگن، بیراق «هېچ قندهی اساسي چاره کۉریلمهگن».
طالبان نظارتیدهگی ملي تلویزیونی نینگ خبر بېریشیچه، پاکستان نینگ ننگرهار ولایتی بهسود تومنیگه قیلگن هوا هجوملریده بیر عایله نینگ 25 نفر اعضاسی هلاک بۉلگن یاکه یرهلنگن.
ملي تلویزیونینینگ خبریگه کۉره، کېچه یریم تونده بهسود اولسواللیگیده بیر تورر جای هوا هجومیگه اوچرهگن.
طالباننینگ ننگرهار ولایتیدهگی خوفسیزلیک قوماندانلیگی سۉزلاوچیسی سید طیب حمادنینگ ایتیشیچه، پاکستان اوچاقلری بهسود، خوگیاني و غنی خېل تومنلریگه هجوم قیلگن.
پکتیادهگی منبعلرگه کۉره، پاکستان قیرووچی اوچاقلری کېچه یریم تونده برمل تومنی مرغه منطقهسیده هوا هجوملری اویوشتیرگن.
طالبان مدافعه وزیرلیگی پاکستان تامانیدن ننگرهار و پکتیکا ولایتلرینینگ بیر نېچته حدودلریگه اویوشتیریلگن هوا هجوملریده بیر دیني مدرسه و بیر نېچته تورر جایلر نشانگه آلینگنینی معلوم قیلدی.
طالبلر سۉزلاوچیسی ذبیح الله مجاهد ایکس اجتماعي ترماغیده یازگن بیاناتیده پاکستان حربيلری کېچه ینه افغانستان حدودیگه تجاوز قیلگنینی بیلدیرگن.
او انیق رقملرنی کېلتیرمهگن حالده، اوشبو هجوملرده اۉنلب آدملر هلاک بۉلگنی یاکه یرهلنگنی حقیده یازگن.
مجاهدنینگ ایتیشیچه، «پاکستانلیک جنراللر بوندهی جنایتلر آرقهلی اۉز مملکتلریدهگی خوفسیزلیکدهگی ضعیفلیکلرنی قاپلشگه اورینماقده.»
