طالبلر ایچکی ایشلر وزیرلیگینینگ معلوم قیلیشیچه، اوشبو گروه کوچلری پاکستاندن تورخم آرقهلی آلیب کیریلهیاتگن۵۲۵ دانه قورال و اۉق-داریلرنی انیقلب، مصادره قیلگن.
وزیرلیک بوگون (شنبه،۲حوت) اعلان قیلگن بیاناتیده ایتیلیشیچه، مذکور قورال و اۉق-داریلر پاکستاندن چیقریب یوباریلگن مهاجرلرنی آلیب کېتهیاتگن ایکّی ته ترانسپورت واسطهسیگه یشیریلگن بۉلگن.
طالبلر ایچکی ایشلر وزیرلیگینینگ بیلدیریشیچه، اوشبو حالت بۉییچه ایکّی کیشی حبسگه آلینگن و تېرگاو ایشلری دوام اېتماقده.
بیاناتده قۉشیمچه قیلینیشیچه، مصادره قیلینگن قورال-اسلحهلر ترکیبیگه۲۷ مینگ دانه اۉق،۲۰۰ دانه « پرمیکات» پاکتی،۱۰ میل M4 روسوملی میلتیق،۱۰ دانه لزېر،۱۰ دانه آپتیک کۉریش ماسلمهسی،۱۷ دانه تیتیکوف تۉپّانچهسی،۱ دانه کَلاشنیکوف و۴۹۷ دانه تۉپّانچه کیرهدی.
حاضرچه اوشبو قوراللر کیملر تامانیدن و قندهی مقصدده افغانستانگه آلیب کیریلهیاتگنی نامعلوم.
بو قوراللر شوندهی بیر پیتده انیقلنگنکی، منطقه نینگ تورلی دولتلری افغانستانده ترورچی گروهلر موجودلیگی یوزهسیدن بیر نېچه بار خواطر بیلدیرگن.
پاکستان حکومتی هم اۉز نوبتیده، پاکستان طالبلری حرکتی (تیتیپی) و باشقه عصیانچی گروهلر افغانستانده فعال اېکنی همده اوشبو مملکت حدودیدن پاکستانگه قرشی فایدهلنیلهیاتگنینی دعوا قیلماقده.
بوندن تشقری، افغانستان و پاکستان اۉرتهسیدهگی چېگره قریب بېش آیدن بېری، طالبلر و پاکستان کوچلری اۉرتهسیدهگی تۉقنهشوولر سببلی یاپیق قالماقده. حاضرده پاکستان فقطگینه چیقریب یوباریلگن مهاجرلرگه قوروقلیک چېگرهلری آرقهلی افغانستانگه اۉتیشگه رخصت بېرماقده.
