ایراننینگ پایتختی تهران شهریده بیر قنچه استادلر، محصللر و یاشلرنینگ تشبثی بیلن امیرعلیشیرنوایی و ظهیرالدین محمد بابر توغیلگنی هفتهسیگه بغیشلب ییریک علمی تدبیر بۉلیب اۉتدی.
ایراندهگی تورک-اۉزبېک طلبهلر تشبثی بیلن تشکیل اېتیلگن اوشبو علمی تدبیرده ایکّی بویوک تورک متفکری – امیر علیشیر نوایي و ظهیرالدین محمد بابرنینگ علمي-معنوي میراثی، سیاسي و مدني فعالیتی چوقور تحلیل قیلیندی.
شونینگدیک محفلده دوکتور محمد کاظم امینی نطق سۉزلب بویوک شاعر امیرعلیشیر نوایی همده عدالتلی شاه ظهیرالدین محمد بابرنینگ تورلی بۉلیملرگه قالدیرگن قیمتلی اثرلری همده اولرنینگ بوتون بشریت اوچون بجرگن فعالیتلری اوستیده توختهتیلیب صحبت قیلدی.
عین حالده، ییغینده «امیرعلیشیر نوایینینگ وقفیاتلری تحقیقی مقالهسی»، «بابرنینگ صنعت و معمارچیلیکنی رواجلنتیریشدهگی اۉرینی»، «قندهارنینگ استراتیژیک اهمیتی و صفویلر بیلن بابرلری مناسبتلری»، «امیرعلیشیر نوایی نینگ تیموریلر دوریدهگی سیاسی فعالیتی» و «صفویلر و بابریلر اۉرتهسیدهگی مناسبتلرگه تاثیر اېتووچی» کبی علمی و تحقیقی مقالهلر اۉقیلدی.
تدبیرده اشتراکچیلر تامانیدن مذکور موضوعلردهگی علمي مقالهلر تنقیدي نقطهی نظردن محاکمه قیلیندی. مقصد – تورکي خلقلر تاریخی و مدنیتیگه عاید علمي ایزلنیشلرنی چوقورلشتیریش، ینگی تدقیقاتلر اوچون زمین یرهتیش اېدی.
احتفال سۉنگیده بوندهی اوچرهشوولرنی منتظم اۉتکزیش، نوایي و بابر میراثینی اۉرگنیش بۉییچه علمي ایشلرنی دوام اېتتیریشگه علیحده تأکید بۉلدی.
