ایراننینگ سیستان و بلوچستان ولایتیده افغانستان یشاووچیلرینی آلیب کېتهیاتگن ایکّی موتر تۉقنهشووی عاقبتیده۴ کیشی اۉلگن ۲۱ کیشی یرهلنگن.
ایرنا اخبارات آژانسینینگ خبریگه کۉره، زاهدان طبیات بیلیم یورتی تېز یاردم بۉلیمی تخنیکي و عملیات مصلحتچیسی حسن شهبخشنینگ معلوم قیلیشیچه، واقعه بوگون، دوشنبه،۲۷ دلو ساعت۸:۰۰ ده سراوان-کلپورگان یۉنهلیشیده، سراوان- کلپورگان اولسواللیگی کَلپورگن قیشلاغیدن 5 کیلو متر مصافهده یوز بېرگن.
اونینگ سۉزلریگه کۉره، اوشبو حادثهده افغانستان فقرالرینی تشووچی ایکّی تویوتا یوک موتری تۉقنهشگن.
شهبخشنینگ ایتیشیچه، واقعه حقیده خبر بېریلگچ، اوچته تېز یاردم موتر واقعه جاییگه یېتکزیلگن و تېز یاردم خادملری جراحت آلگنلرگه دستلبکی طبي یاردم کۉرستگن.
یرهلنگنلر دستلبکی یاردمنی آلگچ، دوامي دوالنیش اوچون رازی و ایرانمهر سراوان شفاخانهلریگه یوباریلگن. بعضی جراحت آلگنلرنینگ حالتی آغیرلیگی قید اېتیلگن.
شونگه اۉخشش واقعهلر افغانستان فقرالری آرهسیده کۉپ مراتبه قربانلر بېرگن.
ایشسیزلیک و اقتصادي قیینچیلیکلر سببلی افغانستان فقرالری مجبوریت بیلن ناقانوني یۉل آرقهلی اېراننی کېسیب اۉتهدی. بو خوفلی یۉل وقتی-وقتی بیلن مهاجرلرنینگ حیاتیگه ضامن بۉلهدی. کۉپلب مهاجرلر ایران چېگره خادملری آتیشمهلری، یېرگه اۉرنهتیلگن ماین و ترافیک حادثهلری عاقبتیده هلاک بۉلگن.
