ننگرهاردهگی طالبلر خوفسیزلیک مسووللرینینگ ایتیشیچه، بتیکوت اولسواللیگیده اېسکی پارتلهمهگن قورال-مادّهلر پارتلشی نتیجهسیده ایکّی باله هلاک بۉلگن و ینه بېش باله یرهلنگن.
ننگرهاردهگی طالبان امنیه قوماندانلیگی سۉزلاوچیسی سید طیب حمادنینگ ایتیشیچه، واقعه بوگون (پنجشنبه،۲۳ دلو) «سپین-خور»، تۉرتینچی دلهده، بتیکوت اولسواللیگیده یوز بېرگن.
اونینگ سۉزلریگه کۉره، حادثه بالهلر پارتلهمهگن قورال-مادّهلرنی آلاوگه تشلهگن پیتده یوز بېرگن.
اونینگ قۉشیمچه قیلیشیچه، یرهلنگن بالهلر دوالنیش اوچون ننگرهار ولایت شفاخانهسیگه یېتکزیلگن.
بیر نېچه اۉن ییللیک اوروشلر نتیجهسیده افغانستاننینگ اَیریم حدودلری ماین و پارتلاوچی مادّهلر بیلن افلاسلنگن.
بیرلشگن ملتلر تشکیلاتی معلوماتلریگه کۉره، افغانستانده اوچ میلیون۳۰۰ مینگ کیشی ماین و پارتلاوچی مادّهلر بیلن افلاسلنگن منطقهلرنینگ بیر کیلومترلیگیده یشهیدی.
بیرلشگن ملتلر تشکیلاتینینگ افغانستاندهگی ادارهسی (یوناما)نینگ ایتیشیچه، افغانستان اوروشدن قالگن ماین و پارتلاوچی مادّهلر سببلی اېنگ کۉپ هلاک بۉلیش بۉییچه دنیاده اوچینچی اۉرینده تورهدی.
