طالبلرنینگ ننگرهاردهگی محلي مسووللری سپینغر اولسواللیگی تالک کانی قولهب توشیشی عاقبتیده بیر کانچی هلاک بۉلگنینی، ینه بیر کیشی اېسه جراحتلنگنینی معلوم قیلدی.
ننگرهاردهگی طالبان خوفسیزلیک قوماندانلیگی مطبوعات کاتبی سید طیب حمادنینگ ایتیشیچه، حادثه تیناوون (سهشنبه،۲۱ دلو) سپینغر تومنی نینگ « مامند ناو» منطقهسیده یوز بېرگن.
اونینگ سۉزلریگه کۉره، کانچیلر غیر حرفهای طرزده قزیش ایشلری آلیب بارهیاتگن پیتده کان قولهب توشگن و اولر توپراق آستیده قالیب کېتگن.
اوّل هم کانلرده شونگه اۉخشش حادثهلر کانچیلرنینگ حیاتیگه ضامن بۉلگن.
غیر حرفهای و خوفسیزلیک قاعدهلریگه رعایه قیلینمهگن حالده قزیب آلیش، شونینگدېک ایشچیلر اوچون ضرور حمایه واسطهلری نینگ یۉقلیگی بوندهی فاجعهلی حادثهلرنینگ اساسي عامللری صفتیده کۉرسهتیلهدی.
افغانستاننینگ یېرآستی بایلیکلری و کانلرینی قزیب آلیش ایشلری حاضرده طالبان نظارتی آستیده کېنگ کۉلمده دوام اېتماقده. ایتیلیشیچه، طالبان اۉز بودجهسینی اساسن کانلر آرقهلی مالیهلشتیریشگه حرکت قیلماقده؛ مخالفلر اېسه بونی افغانستان بایلیکلرینی تالان-تاراج قیلیش دېب بهالهماقده.
