میمنه شهریده، حضرت امیر علیشېر نوايی و ظهیرالدین محمد بابرنینگ تولد هفتهسی مناسبتی بیلن آیدین فاریاب خصوصی لیسهسی تشبثیده «نوایی و بابر خوانلیک کېچهسی» طنطنهلی روشده اۉتکزیلدی. اوشبو معنوی – معرفی مجلس کۉترینکی روحده، ملی و ادبی قدریتلریمیزگه حرمت افادهسی صفتیده تشکیل اېتیلدی.
مذکور ادبی ییغینده بیلیم یورت استادلری، دین علمالری، آقسقاللر، شاعر و یازووچیلر همده قطار مدنی فعاللر اشتراک اېتدیلر. مجلس دوامیده بویوک متفکرلریمیز نینگ بای ادبی، علمی و مدنی میراثی حقیده اطرافلیچه سۉز یوریتیلدی.
اینیقسه، شاعر و تیلشناس استاد تاشقین بهایی، فاریاب بیلیم یورت استادی پوهاند محمد اشرف شریفی، فاریاب بیلیم یورتی استادی سید حسامالدین تویغون، البیرونی بیلیم یورت استادی دوکتور سید مبین هاشمی همده استاد عبدالرب نسیمی نوايی و بابر نینگ حیاتی، اولر نینگ ادبی، علمی و مدنی میراثی، اۉزبېک تیلی و ادبیاتی رونقیدهگی بېقیاس خدمتلری حقیده مضمونلی نطق بیان قیلدیلر.
سۉزلشووچیلر اۉز چیقیشلریده بو ایکّی بویوک سیمانینگ اېل آلدیدهگی اۉرنی، معنوی میراثی نینگ بوگونگی اولاد تربیهسیدهگی اهمیتینی علیحده تأکیدلهدیلر.
مجلس دوامیده نوایی و بابر قلمیگه منسوب شعرلردن نمونهلر اۉقیب اېشیتتیریلدی. شونینگدېک، مذکور مجلسگه بغیشلب یازیلگن شعرلر هم شاعرلر تامانیدن افادهلی طرزده مطالعه قیلیندی. کېچه ادبی روح، معرفی صحبتلر و صمیمی مشاعرهلر بیلن ینهده فیضلی توس آلدی.
اوشبو «نوايی و بابر خوانلیک کېچهسی» یاشلر قلبیده آنه تیلیمیزگه، ملی ادبیاتیمیزگه و بویوک اجدادلریمیز میراثیگه بۉلگن مِهر و حرمت تویغولرینی ینهده مستحکملشگه خدمت قیلدی.
