بیرلشگن ملتلر تشکیلاتینینگ انسانپرورلیک یاردملرینی موافقلشتیریش ادارهسی (اوچا)۲۰۲۶ ییلده افغانستانده۴.۲میلیون کیشی باشپناهگه محتاج بۉلیشینی بیلدیرگن.
اوشبو اداره بوگون (یکشنبه،۱۹ دلو) ایکس اجتماعي ترماغیده اعلان قیلگن پُستیده ایتیشیچه، انسانپرورلیک تشکیلاتلری۸۸۱ مینگ کیشیگه یاردم بېریشنی اوستوار قیلگن و بونینگ اوچون۱۶۰.۳ میلیون دالر مبلغ ضرور.
اوچا معلوماتیگه کۉره، یاردم افغانستاننینگ برچه۳۴ ولایتیده تقدیم اېتیلهدی و فوقالعاده باشپناه، آزیق-طعام بۉلمهگن نرسهلر، قیشکی یاردم، ضرر کۉرگن اویلرنی ترمیملش و اۉتیش باشپناهلرینی اۉز ایچیگه آلهدی.
اوشبو حساباتده ایتیلیشیچه، بحران درجهسی یوقاری حدودلر، قورغاقچیلیک خوفی بۉلگن جایلر، کۉپ ترماقلی جدّي احتیاجلر موجود حدودلر، طبيعي آفتلردن ضرر کۉرگن حدودلر و پاکستان همده ایراندن قَیتگنلرنینگ مهماندار تومنلری اوستوار حسابلنهدی.
اوچانینگ تاکیدلهشیچه،۲۰۲۶ ییلده افغانستان سېل، زلزله و یېر سیلکینیشیگه نسبتاً ضعیفلیگی سببلی باشپناه منبعلرگه باسیم آشهدی و احتیاجلر کۉپهیهدی.
اوشبو ادارهنینگ قۉشیمچه قیلیشیچه:۲۰۲۵ ییلده افغانستانده۱۵مینگ کیشی سېل و یامغیر عاقبتیده ضرر کۉرگن، اولرنینگ۹۰ فایزی حلی هم چادرلر یاکه ضرر کۉرگن اویلریده یشهماقده، چونکه انسانپرورلیک شریکلری اولرگه یاردم بېریش اوچون مبلغ اجرهتمهگن.
اوچاشونینگدېک، افغانستانگه قَیتگنلرنینگ۲۴ فایزدن آرتیغی باشپناهنی اساسي احتیاج صفتیده کۉرسهتگنینی بیلدیرگن، بو اېسه باشپناه ساحهسیدهگی یېتیشماوچیلیکنی کۉرسهتهدی.
بیرلشگن ملتلر تشکیلاتینینگ انسانپرورلیک یاردملرینی موافقلشتیریش ادارهسی شونینگدېک، سۉنگگی ایکّی ییل ایچیده نارسمي یشش پونکتلری کمهیگن بۉلسه-ده، تخمیناً۳۹۰مینگ عایله افغانستان بۉیلب۹۰۰ گه یقین نارسمي یشش پونکتلریده یششده دوام اېتهیاتگنینی بیلدیرگن.
اوچا۲۰۲۶ ییل باشپناه دستوریده ضعیف گروهلرنی، خصوصاً عیاللر، بالهلر و معلوللیگی بۉلگن شخصلرنی حمایه قیلیش مرکزي اۉرین توتیشینی ایتگن.
اوشبو اداره افغانستاندهگی انسانپرورلیک ایشلرینینگ محیطینی قیینلیگیچه قالیشینی، اما اولر ماسلشووچنلیک بیلن طالبان بیلن مذاکره قیلیب، انسانپرورلیک فعالیتینی سقلشگه حرکت قیلیشلرینی بیلدیرگن.
سۉنگی بیر ییل ایچیده افغانستان کۉپلب طبيعي آفتلرگه، جملهدن زلزله و سېلگه دوچ کېلگن، بو اېسه مینگلب اویلرنینگ ویران بۉلیشی و عایلهلرنینگ باشپناهسیز قالیشیگه سبب بۉلگن.
شونینگدېک، سۉنگگی بیر ییل ایچیده۲.۵میلیوندن آرتیق مهاجر پاکستان و ایراندن افغانستانگه قَیتگن، بو باشپناه و اوی-جایگه بۉلگن احتیاجنی آشیرگن و نرخلرینینگ کۉتریلیشیگه سبب بۉلگن.
