ایکّی منبع اکسیوس نشریگه بېرگن معلوماتیگه کۉره، ایران امریکا بیلن بۉلهدیگن مذاکرهلرنینگ جایی و شکلینی اۉزگرتیریشنی طلب قیلگن.
اوشبو عاموی اخبارات واسطهلری خبریگه کۉره، ایرانلیکلر مذاکرهلرنی استانبولدن عمان دولتیگه کۉچیریشنی ایستهماقده.
شونینگدېک، گزارشده ایتیلیشیچه، ایران رسميلری حاضرده مذاکرهلر فقط ایکّی تامانلهمه شکلده فقط امریکا اشتراکیده اۉتکزیلیشینی خواهلهماقده. اولر بیر نېچته عرب و مسلمان دولتلرینینگ کوزهتووچی صفتیده قتنهشیشیگه قرشی.
خبردار منبعلردن بیرینینگ ایتیشیچه، بونینگ سببی شوندهکی، ایران مذاکرهلرنی فقط هسته مسألهلری بیلن چېکلشنی ایستهیدی و منطقهنینگ باشقه دولتلری اوچون مهم بۉلگن راکتلر و وکیل گروهلر (پراکسی کوچلر) مسألهسینی بحث قیلیشنی خواهلهمهیدی.
بیر عربی منبع اکسیوسگه بېرگن معلوماتیگه کۉره، مذاکرهلر جمعه کونی عمانده بۉلیب اۉتیشی کوتیلماقده و ترامپ دولتی ایراننینگ طلبیگه راضی بۉلگن.
اوشبو منبع، شونینگدېک، عماندهگی مذاکرهلرگه منطقهنینگ باشقه دولتلرینی قۉشیش مسألهسیدهگی بحثلر دوام اېتهیاتگنینی ایتگن.
آق اوی بو بارهده ایضاح بېریشدن باش تارتدی.
کوتیلیشیچه، ویتکاف و عباس عراقچی هر ایکّی مذاکره هیئتیگه رهبرلیک قیلهدی.
عراقچی سهشنبه کونی عمان و تورکيهدهگی همکسبلری بیلن، شونینگدېک، قطر باش وزیری بیلن تېلفون آرقهلی ملاقات قیلگن.
شو پیتده، ویتکاف اسراییلده اسراییل باش وزیری بنیامین نتنیاهو بیلن اوچرهشوو اۉتکزگن.
اسراییل رسميلرینینگ ایتیشیچه، اوشبو اوچرهشوو ایران مسألهسیگه بغیشلنگن بۉلیب، اونده بنیامین نتنیاهو بیلن بیرگه اسراییل مدافعه کوچلری باش رهبری و موساد مدیری دیوید بارنی هم اشتراک اېتگن.
