طالبلر باش وزیرینینگ اقتصادي مسألهلر بۉییچه اۉرینباسری عبدالغنی برادر تورکمنستان باش وزیری اۉرینباسری و تشقی ایشلر وزیری رشید مردوف بیلن اوچرهشووده اوشبو مملکتدن تورغندی-هرات تېمیر یۉلی لایحهسی بۉییچه اۉز موضعینی انیق بیان اېتیشنی سۉرهدی.
طالبان باش وزیرینینگ اقتصادي مسألهلر بۉییچه اۉرینباسری ادارهسی بیاناتیگه کۉره، اوشبو اوچرهشوو بوگون (یکشنبه،۱۲ دلو) مملکتنینگ غربیده جایلشگن هرات ولایتیده بۉلیب اۉتگن.
طالبان باش وزیرینینگ اقتصادي مسألهلر بۉییچه اۉرینباسری تورکمنستان تشقی ایشلر وزیریگه قزاقستان هم اوشبو لایحهنی عملگه آشیریشگه قیزیقیش بیلدیرگنینی ایتگن.
بیاناتده یازیلیشیچه، تورکمنستان تشقی ایشلر وزیری بو مملکتنینگ تورغندی-هرات تېمیر یۉلی لایحهسیگه سرمایه کیریتیشگه قیزیقیشینی بیلدیرگن و اوشبو لایحه بۉییچه عملي ایشلر تورغوندیده باشلنگنینی ایتگن.
اوچرهشووده طالبان و تورکمنستان رسميلری تاپی لایحهسی همده برق انرژیسی یېتکزیب بېریش مسألهلرینی هم محاکمه قیلگن.
عبدالغنی برادر سعوديه عربستانینینگ «دلتا اینترنشنال» شرکتی تپی̇ لایحهسیگه سرمایه کیریتیشگه قیزیقیش بیلدیرگنینی ایتگن.
اونینگ سۉزلریگه کۉره، اوشبو شرکت تپی̇ لایحهسی دایرهسیده گاز خریدی، تورکمنستاننینگ ییریک گاز بلاکلری قوّتینی آشیریش، هرات ولایتینینگ گذره اولسواللیگی قندهار ولایتینینگ اسپین بولدک تومنیگچه گاز قووورینی قوریش و رواجلنتیریش، قووورنی اسپین بولدکدن هندستان چېگرهسیگچه اوزهیتیریش همده پاکستاننینگ گوادر بندری زمانهوي و ییریک گاز مرکزینی برپا اېتیشگه سرمایه کیریتیشنی رېجهلشتیرماقده.
طالبان باش وزیرینینگ اقتصادي مسألهلر بۉییچه اۉرینباسری ادارهسی بیاناتیگه کۉره، تورکمنستان تشقی ایشلر وزیری تاپی̇ لایحهسیگه خارجي شرکتلرنینگ قیزیقیشینی آلقیشلب، بو بارهده یقین همکارلیک ضرورلیگینی تأکیدلهگن.
آلدینراق سعوديه عربستانینینگ «دلتا اینترنشنال» شرکتی مسوولی امریکانینگ افغانستان بۉییچه سابق مخصوص وکیلی زلمی خلیلزاد بیلن بیرگه کابلگه تشریف بویوریب، طالبان باش وزیرینینگ اقتصادي مسألهلر بۉییچه اۉرینباسری بیلن اوچرهشوو اۉتکزگن اېدی.
بوگونگی اوچرهشووده عبدالغنی برادر، شونینگدېک، طالبان «تاپ» لایحهسینی یکونلشگه و مملکت شِمالیدهگی بلامرغاب، خماب و قرقین اولسواللیکلریگه برق انرژیسینی اوزهتیش بارهسیده همکارلیک قیلیشگه تیار اېکنینی ایتگن.
تورکمنستان باش وزیری اۉرینباسری و تشقی ایشلر وزیری اېسه اوشبو مملکت افغانستانگه بېش یۉنهلیش آرقهلی برق انرژیسی یېتکزیب بېریشگه و اونینگ قوّتینی آشیریشگه تیارلیگینی بیلدیرگن.
طالبان افغانستانده قَیته حاکمیتنی قۉلگه آلگنیدن سۉنگ، تورکمنستان اوشبو گروه بیلن کېنگ کۉلملی سیاسي و اقتصادي علاقهلرنی یۉلگه قۉیگن.
هر ایکّی تاماننینگ یوقاری مرتبهلی رسميلری بیر نېچه بار کابل و عشق آبادگه تشریف بویوریب، تورلی ساحهلرده همکارلیک بیتیملرینی امضالهگن.
