افغانستاننینگ جاپاندهگی اېلچیسی شیدامحمد ابدالی بوگوندن (شنبه،۱۱ دلو) باشلب اوشبو اېلچیخانه فعالیتی تۉختهتیلیشینی اعلان قیلدی.
ابدالینینگ بیاناتیده ایتیلیشیچه، بوگون افغانستاننینگ توکیودهگی اېلچیخانهسی فعالیتینینگ سۉنگگی کونی بۉلیب، اېلچیخانه رسمي روشده جاپان تشقی ایشلر وزیرلیگی نمایندهلریگه تاپشیریلگن.
اونینگ سۉزلریگه کۉره، وینا کانوانسیونیگه موافق، جاپان حکومتی اېلچیخانه بناسی، اونینگ مال-ملکی و آرشیفلرینی محافظه قیلیش مسوولیتینی اۉز ذمّهسیگه آلهدی.
ابدالی افغانستانده قانوني حکومت ایش باشلهگنیدن سۉنگ، اېلچیخانه برچه مال-ملکی و حجتلری بیلن بیرگه ینه مملکتنینگ وکالتلی وکیلیگه تاپشیریلیشیگه امید بیلدیرگن.
او اېلچیخانه فعالیتی نېگه و قَیسی سببگه کۉره تۉختهتیلگنیگه انیقلیک کیریتمهگن.
افغانستاننینگ جاپاندهگی اېلچیخانهسی حاضرگچه سابق حکومت نامیدن فعالیت یوریتیب کېلگن و اونینگ اېلچیسی هم اوّلگی حکومت تامانیدن تعیینلنگن اېدی.
اېلچیخانه جاري ییلنینگ جدی آییده اۉز فعالیتی ۲۰۲۶-ییل ۳۱-جنوریدن باشلب تۉختهتیلیشینی اعلان قیلگن، بیراق اۉشنده هم بو قرارنینگ سببلرینی توشونتیرمهگن.
آلدینراق، اَیریم دولتلردهگی افغانستان اېلچیخانهلری طالباننینگ مېزبان دولتلرگه باسیمی سبب فعالیتینی تۉختهتگن اېدی.
سۉنگّی تۉرت ییل دوامیده جاپان طالبان بیلن علاقهده بۉلیب کېلماقده و کابلدهگی اۉز اېلچیخانهسینی آچیق سقلب قالگن، بیراق توکیو هنوزگچه طالبان حکومتینی رسماً تن آلمهگن.
