اروپا اتفاقینینگ افغانستاندهگی نمایندهلیگینینگ ایتیشیچه،۱۶ میلیون یورو سرمایه بیلن کابلده سرطان کسللیکلرینی انیقلش و دوالش مرکزی تشکیل اېتیلیشیگه یاردم بېریلگن.
اوشبو شفاخانه بوگون (پنجشنبه،۹ دلو) طالبان نمایندهلری، اروپا اتفاقی و جهان ساغلیقنی سقلش تشکیلاتی نمایندهلری اشتراکیده آچیلدی.
اروپا اتفاقی نمایندهلیگی خبریگه کۉره، بو مرکز سرطان و باشقه کسللیکلرنی(NCDs)آلدینی آلیش، انیقلش و دوالش بۉییچه بیرینچی مرکز صفتیده تشکیل اېتیلگن.
نمایندهلیک شونینگدېک، افغانستاندهگی طبیات خادملری، عیاللر و اېرککلرنینگ جانبازلیگی و ملَکهسینی قدرلشینی، اولرنینگ انسان حیاتینی سقلش و ساغلیقنی سقلش تیزیمینی مستحکملشدهگی مهملیگینی تأکیدلهدی.
طالبان ساغلیقنی سقلش وزیرلیگی خدمت کۉرسهتیش بۉییچه اۉرینباسری عبدالولی حقانی نینگ ایتیشیچه، اوشبو سرطان مرکزینینگ آچیلیشی ساغلیقنی سقلش ساحهسیده کتّه اۉزگریش دیر.
او شونینگدېک، آخرگی ییللرده افغانستان یشاوچیلری سرطاننی انیقلش و دوالش امکانیتی بۉلمهگنی سببلی چېت اېلگه کېتیشگه مجبور بۉلردیلر دېدی.
شونینگدېک، افغانستاندهگی ضعیف طبي امکانیتلر یشاوچیلرنی باشقه کسللیکلرنی دوالش اوچون هم چېت اېلگه باریشگه مجبور قیلگن. بو اېسه یوقاری خرجتلر و ویزهنی آلیشدهگی قیینچیلیکلر بیلن باغلیق.
