افغانستان ژورنالیستلر مرکزینینگ معلوم قیلیشیچه، طالباننینگ امر به معروف و نهي از منکر ادارهسی کاپیسا ولایتیده تیریک موجوداتلر تصویرینی نشر قیلیشنی منع قیلگن.
مرکزنینگ ایتیشیچه، اوشبو بویروق اجراسی نتیجهسیده کاپیسا ملي تلویزیون رادیو فورمتیگه اۉتکزیلگن، خصوصي یېتکرمهلر فعالیتی اېسه ینه-ده کېسکین چېکلنگن.
افغانستان ژورنالیستلر مرکزینینگ قۉشیمچه قیلیشیچه، حاضرده کاپیساده حکمران اداره تصرفیدهگی دولت یېتکرمهلریدن تشقری، «صدای نجراب»، «ندایی حقیقت» و «طنین صدا» ناملی خصوصي رادیولر هم فعالیت یوریتماقده و اولر هم جانلی تصویرلرنی نشر قیلیش منع بۉلگنیدن تأثیرلنگن.
کاپیسا جانلی تصویرلر منع اېتیلگن ییگیرمه بېشینچی ولایت حسابلنهدی.
یېتکرمهلرده جانلی تصویرلرنی منع قیلیش جریانی ۱۴۰۳-ییل اسد آییدن باشلنگن بۉلیب، بو تعقیق طالباننینگ امر به معروف و نهي از منکر تۉغریسیدهگی قانونیده هم قید اېتیلگن.
افغانستان ژورنالیستلر مرکزینینگ تأکیدلشیچه، حکمران اداره تامانیدن یېتکرمهلر و ژورنالیستلرگه نسبتاً جاري اېتیلگن چېکلاولر، خصوصاً جانلی تصویرلرنی نشر قیلیش تعقیقی، اخبارات ترقهتیش جریانیگه جدّي ضرر یېتکزگن، شونینگدېک، قطار یېتکرمهلرنینگ یاپیلیشیگه و کۉپلب ژورنالیست همده مېدیه خادملرینینگ ایشسیز قالیشیگه سبب بۉلگن.
