طالبلر سۉزلاوچیسی ذبیحالله مهاجد بو گروه بیلن امریکا اۉرتهسیده محبوسلر المشینووی بۉییچه مذاکرهلر دوام اېتهیاتگنینی ایتگن.
سیبیاس نیوز خبریگه کۉره، طالبان سۉزلاوچیسی «بو مذاکرهلر انیق نتیجهلرگه و یکوني خلاصهگه آلیب کېلیشی، هر ایکّی تامان محبوسلرینینگ آزاد اېتیلیشینی کفالتلشی کېرهک دېگن.»
مجاهد بیر ییلگه یقین وقتدن بېری «دنیس کویل» اسملی امریکا فقراسی اوشبو گروه حبسیده اېکنینی تصدیقلهگن و حاضرچه اونی المشیش بۉییچه کېلیشووگه اېریشیلمهگنینی بیلدیرگن.
طالبان سۉزلاوچیسی امریکاده اوشبو گروهنینگ اَیریم اعضالری قماقده اېکنیگه اشاره قیلیب، «اولرنینگ تقدیری و عایلهلرینینگ عذابی باشقه محبوسلرنینگ تقدیریگه اۉخشهیدی»، دېگن.
سیبیاس نیوز خبریگه کۉره، طالبان استخباراتی اۉتگن ییل نینگ 26-جنوری کونی دنیس کویلنی کابلدهگی یشش جاییدن حبسگه آلگن.
کویلنینگ عایلهسی اوشبو یېتکرمهگه ایتیشیچه، او یېرتۉلهدهگی بیر خانهده سقلنماقده و حاجتخانه (تشناب)دن فایدهلنیش اوچون طالباندن رخصت آلیشی کېرهک.
دنیس کویلنینگ عایله اعضالری اونینگ قریب ییگیرمه ییل دوامیده افغانستانده تیلشناسلیک تدقیقاتلری بیلن شغللنگنینی و مملکت خلقی مدنیتیگه چوقور حرمت بیلن قرهشینی ایتیشگن.
طالباننینگ ایکّی اعضاسی سیبیاس نیوزگه کویل «تۉلیق ساغلام» اېکنینی و تېز آرهده اونینگ ایشی بۉییچه رسمي جریان باشلنیشینی بیلدیرگن.
امریکا قۉشمه ایالتلری تشقی ایشلر وزیرلیگی سیبیاس نیوزگه یوبارگن بیاناتیده شوندهی دېگن: «طالبان زودلیک بیلن دنیس کویل نی و افغانستانده حبسده سقلنهیاتگن برچه امریکالیکلرنی آزاد قیلیشی همده گروگه آلیش دیپلوماتيهگه برهم بېریشی کېرهک.»
سیبیاس خبریگه کۉره، دنیس کویلدن تشقری ینه بیرامریکا فقراسی هم طالبان حبسیده قالماقده.
طالبان اوّلراق امریکا بیلن آلیب باریلگن مذاکرهلر نتیجهسیده ویلیام مک کنتی، رایان کوربت، جورج گیلزمن و دافی هال افغانستانده قماقده بۉلگن امریکا فقرالرینی آزاد قیلگن.
امریکا اېسه اۉز نوبتیده «خان محمد» اسملی طالبان اعضاسینی قماقدن چیقرگن و اوشبو گروه نینگ بیر قنچه یېتکچیلرینی قاره رۉیخطدن آلیب تشلهگن.
