بیرلشگن ملتلر تشکیلاتینینگ سیاسي و تینچلیک ایشلری بۉییچه باش کاتبی اۉرینباسری رزماری دیکارلو، طالبان ایچکی ایشلر وزیری سراجالدین حقّاني بیلن اوچرهشدی.
طالبان ایچکی ایشلر وزیرلیگی بوگون (یکشنبه،۵ دلو) اعلان قیلگن بیاناتیده، اوشبو اوچرهشووده طالبان و خلق ارا همجمعيت اۉرتهسیدهگی همکارلیکنی رواجلنتیریش، گیاهوند مادّهلر بیلن کورهش، بانک چېکلاولری و انسانپرورلیک یاردملری مسألهلری محاکمه قیلینگنی بیلدیریلدی.
وزیرلیک بیاناتیگه کۉره، سراجالدین حقّاني «گیاهوند مادّهلرنی اېکیش، ایشلب چیقریش و قاچاق اېتیشگه قرشی جدّي و عملي چارهلر کۉریلدی، بو ایجابي نتیجهلرنی بېردی» دېگن.
وزیرلیکنینگ قۉشیمچه قیلیشیچه، تامانلر شونینگدېک، «حقیقي شرایطلر» یاروغیده طالبان و خلق ارا همجمعيت اۉرتهسیده دایمی ملاقات مسألهسینی محاکمه قیلگن، و اۉزارا حرمت و حقیقي همکارلیک ایشانچ محیطینی ینه-ده مستحکملشی انیقلنگن.
طالبان ایچکی ایشلر وزیرلیگی شونینگدېک: « بیرلشگن ملتلر تشکیلاتی هیاتی خوفسیزلیک حالتی و گیاهوند مادّهلر بیلن کورهشدهگی یوتوقلرنی مقتهدی همده انسانپرورلیک یاردملری دوام اېتیشیگه ایشانچ بیلدیردی».
وزیرلیک، طالبان هیاتی و خلقارا همجمعيت اۉرتهسیدهگی ملاقات دوام اېتتیریلیشی ضرورلیگینی تأکیدلهگن و دوحهدهگی ایشچی گروهلر نوبتدهگی ییغیلیشی کابلده طالبان مېزبانلیگیده اۉتکزیلیشینی معلوم قیلگن.
بیرلشگن ملتلر تشکیلاتینینگ افغانستاندهگی باشقروو اۉرینباسرلیک هیاتی(یوناما) حاضرگچه اوشبو سفر حقیده ایضاح بېرمهگن و آجندانی اعلان قیلمهگن.
