هراتدهگی محلي منبعلر هرات شهریدهگی خراسان مارکیتی آلدیدن اۉغیرلب کېتیلگن «نقیبالله» اسملی ییگیتنینگ جسدی تاپیلگنینی اَیتماقده.
منبعلرگه کۉره، اوشبو ییگیتنینگ جسدی هراتنینگ جبریل منطقهسیدن تاپیلگن و تیناوون جمعه،۳ دلو «نوآباد» منطقهسیده دفن اېتیلگن.
منبعلرنینگ ایتیشیچه، نقیباللهنینگ جسدیده پیچاق ضربهلری ایزلری بۉلگن و اۉغیرلهگن شخصلر اونی پیچاقلب اۉلدیرگنی تخمین قیلینماقده.
اوشبو ییگیت۲۵ جدی کونی هراتدهگی خراسان مارکیتده جایلشگن بیر صرافلیکدن چیققنیدن سۉنگ اۉغیرلب کېتیلگن اېدی.
منبعلرنینگ ایتیشیچه، اۉغیرلهگنلر نقیباللهنی بیر رستورانتگه تکلیف قیلیب، زهرلهگن، سۉنگره اۉغیرلب کېتیشگن.
منبعلر بېرگن معلوماتلرگه کۉره، نقیبالله۱۰ مینگ امریکا دالری بیلن بیرگه اۉغیرلب کېتیلگن.
منبعلرنینگ تأکیدلشیچه، طالبان اوشبو ییگیتنینگ اۉغیرلهنیشی و اۉلدیریلیشی بیلن باغلیق حالده بیر کیشینی حبسگه آلگن و تېرگاو ایشلری دوام اېتماقده.
شونینگدېک، منبعلرگه کۉره، اۉغیرلهگن شخصلر اصلی کابل اهالیسی بۉلیب، هراتنینگ جبریل منطقهسیده یشب کېلیشگن.
سۉنگگی پیتلرده مملکتنینگ تورلی شهرلریدن آدم اۉغیرلش و قاتللیک حالتلری کۉپ مراتهبه خبر قیلینماقده.
بو واقعهلر طالبان اوشبو گروه ینه حاکمیتنی اېگهلهگنیدن کېین افغانستانده عمومي خوفسیزلیک تأمینلنگنینی دعوا قیلهیاتگن بیر پیتده صادر بۉلماقده.
