«افغانستاننی قوتقریش ملي قرشیلیک کېنگشی» طالبان تامانیدن «محکمهلرنینگ جنایي اصولنامهسی» تصدیقلشگه مناسبت بیلدیرر اېکن، بو گروه افغانستاننی اۉرته عصرلردن هم بدترراق احوالگه آلیب باریشینی ایتدی.
کېنگش بوگون (جمعه،۳ دلو) اعلان قیلگن بیاناتیده مذکور نظام تصدیقلنیشینی طالباننینگ افغانستان خلقی بیلن آلیب بارهیاتگن «غیرِ انساني و غیری اسلامي مناسبتلرینینگ دوامی» دېب بهالهگن.
«افغانستاننی قوتقریش ملي قرشیلیک کېنگشی» نینگ تأکیدلشیچه، طالبان «آچیق دیني کمسیتیشلرنی قۉللب، فقط بیرته مذهب طرفدارلرینی مسلمان دېب حسابلهیدی، باشقه مذهب ایزداشلری اېسه بدعتچی دېب اعلان قیلینماقده همده اسلام دینی تعلیماتلریگه ضد روشده جمعیتنی ابتدایي و اۉرته عصرلرگه خاص اصولده تورلی طبقهلرگه بۉلماقده.»
کېنگشگه کۉره، «طالبان بو یاندشوو آرقهلی عملده قوللیکنی قانونيلشتیریب، عیالنی کنیزک صفتیده، اېرنی اېسه عیال نینگ خۉجهیینی و اېگهسی صفتیده کۉرسهتماقده همده جمعیتگه انساني مېزانلرگه ضد، کمسیتووچی جزالر مجموعهسینی مجبورن جاري اېتماقده.»
«افغانستاننی قوتقریش عالي ملي قرشیلیک کېنگشی» بیاناتیده ایتیلیشیچه، کېنگش «باشقه مذهب طرفدارلریگه باسیم اۉتکزیش، کمسیتیش، قۉرقوو و یۉق قیلیش محیطینی یرهتیش مملکتنی بۉلینیش، بېقرارلیک و ینه-ده کۉپراق زۉرآورلیک تامان یېتهکلهیاتگنی همده مملکتده تینچ-تاتوو یششگه جدّي تهدید سالهیاتگنیگه ایشانهدی.»
بیاناتده، شونینگدېک، «بوندهی یاندشوو نهفقط اسلام تعلیماتلریگه آچیق-آیدین ضد، بلکه انسان حقوقلری، اعتقاد اېرکینلیگی و انساني قدر-قیمتینینگ اساسي تمایللرینی هم تۉلیق بوزهدی و عالي ملي قرشیلیک کېنگشی نظریده مطلقا رد اېتیلهدی،» دېییلهدی.
کېنگش ینه تأکیدلهگنیچه، «بو قدم طالبان تامانیدن عیاللر، بالهلر و باشقه ضعیف گروهلرنی تۉلیق چېتلهتیشگه قرهتیلگن تیزیملی اورینیش بۉلیب، بو حرکتلر نهفقط انساني قدر-قیمتنی پایمال قیلهدی، بلکه اسلام دینینینگ دنیا جماعتچیلیگی آلدیدهگی قیافهسینی اتهیلب بوزیشگه قرهتیلگن بۉلیب، افغانستاننی اۉرته عصرلردن هم آغیرراق احوالگه آلیب بارهدی»
انسان حقوقلری بیلن شغللنووچی رواداری تشکیلاتی یقینده طالبان یېتکچیسی هبتالله آخوندزاده اوشبو گروهنینگ «محکمهلرنینگ جنایي اصول نامهسینی» امضالهگنی و او اجرا اېتیلیشی اوچون طالبان محکمهلریگه یوباریلگنینی معلوم قیلگن.
روادارینینگ بیلدیریشیچه، اوشبو نظامده طالبان حنفی مذهبی طرفدارلریدن تشقری باشقه اسلامي مذهب ایزداشلری «بدعتچی» دېب اتهلگن، اجتماعي طبقهلنیش و قوللیککه قانونيلیک بېریلگن.
رواداری بیاناتیگه کۉره، مذکور نظامده عیاللر و بالهلرگه نسبتاً زۉرآورلیک فقط آغیر جسماني زۉرآورلیک بیلن چېکلنگن بۉلیب، روحي و جنسي زۉرآورلیک تعقیقلنمهگن.
شونینگدېک، رواداری معلوماتیگه کۉره، اوشبو نظامده طالبانگه قرشی بۉلگنلر «عصیانچی» دېب اعلان قیلینگن و اولرنی اۉلدیریشگه بویروق بېریلگن.
رواداری نینگ تأکیدلشیچه، مذکور نظامده عدالتلی محکمهنینگ اساسي تمایللری بوزیلگن بۉلیب، اۉزباشیمچهلیک بیلن باستیریش، حبسگه آلیش و قییناقلر خوفینی آشیرهدی.
طالبان حاضرگچه اوشبو اصول نامه نی رسماً اعلان قیلمهگن و اونگه نسبتاً بیلدیریلگن تنقیدلر همده مناسبتلر یوزهسیدن ایضاح بېرمهگن.
