پولنده بیر گروه پولندلیک و افغانستانلیک تدقیقاتچیلر علمي انجمنده افغانستاندهگی وضعیتنی محاکمه قیلدی. اوشبو انجمن یاگیلونیا و بیلیم یورتی و پولند فنلر اکادمیهسی همکارلیگیده «افغانستان حالتینی تحلیل قیلیش» موضوعسیده تشکیل اېتیلدی.
انجمن تشکیلاتچیلریدن بیری، یاگیلونیا و یون نینگ ایرانشناسلیک فاکولتهسی پروفیسوری ماتیئوش کواگیش مذکور ییغیلیشدن کۉزلنگن مقصد افغانستاننینگ حاضرگی حالتینی تورلی ساحهلر کېسیمیده اۉرگنیش همده اونینگ منطقه و دنیا مملکتلریگه تاثیرینی تحلیل قیلیش اېکنینی ایتدی.
او افغانستانده یوز بېرگن سۉنگگی اۉزگریشلر جدّي تدقیقات و اعتبارنی طلب اېتیشینی تاکیدلب، کېلهجکده هم افغانستان موضوعیده شونگه اۉخشش انجمنلر اۉتکزیلیشینی معلوم قیلدی.
انجمنده سۉزگه چیققن افغانستان مسألهلری بۉییچه تدقیقاتچی و پولندنینگ سابق دیپلوماتی مارچین کژیژانوفسکی طالباننینگ باشقروو مدلی حقیده معروضه قیلدی.
او طالباننینگ باش قاضیسی عبدالحکیم حقّانينینگ کتابی طالباننینگ حکومت یوریتیش حقیدهگی قرهشلرینی عکس اېتتیرووچی یازمه حجت اېکنینی ایتدی.
شو بیلن بیرگه او شوندهی دېدی: «طالبان اۉز تیزیمینی ایران اسلام جمهوریتی بیلن سالیشتیریشنی ایستهمهیدی، بیراق تدقیقاتلر اولرنینگ کۉپلب یۉنهلیشلرده ایران مدلیدن الهام آلگنینی کۉرسهتماقده.
خوفسیزلیک مسألهلری بۉییچه تدقیقاتچی و خوفسیزلیک تدقیقاتلری یۉنهلیشیده دوکتورا محصلی بسم الله تابان اېسه نطقیده افغانستاندهگی مرکّب وضعیت، انسان حقوقلرینینگ کېنگ کۉلمده بوزیلیشی، تروریزم و خوفسیزلیک تهدیدلری حقیده گپیردی.
او افغانستان القاعده کبی ترورچی گروهلرنینگ قَیته تیکلنیشی اوچون خوفسیز مکانگه ایلنگنینی تاکیدلهدی.
تاباننینگ ایتیشیچه، «طالبان افغانستاننی، اینیقسه عیاللر اوچون، عملده آچیق قماقخانهگه ایلنتیردی.» او سابق خوفسیزلیک و مدافعه کوچلری حقوقلرینینگ بوزیلیشیگه اشاره قیلیب، طالبلر اولرنینگ وکیللریدن قصاص آلیشنی کوندهلیک استراتیژي صفتیده عملگه آشیرهیاتگنینی بیلدیردی.
تابان طالباننی انسانیت جمعیتی اوچون خوفلی بۉلگن تهلکهلی مفکوره و روایت صفتیده تعریفلب، او گوبل مقیاسده تروریزمنی یاییشگه اینتیلهیاتگنینی ایتدی.
شونینگدېک، او طالبان دیني و اېتنیک جهتدن قانونلر و باشقروو توزیلمهلرینی بیر خیللشتیریش آرقهلی هزارهلر کبی اېتنیک آزچیلیکلرنی همده هندو و سیک کبی مذهبی گروهلرنی جمعیتدن تیزیملی روشده سیقیب چیقریشگه اورینهیاتگنینی قۉشیمچه قیلدی.
