بیرلشگن ملتلر تشکیلاتی خوفسیزلیک کېنگشی کابلدهگی چین رستورانتی نشانگه آلینگن هجومگه مناسبت بیلدیریب، تروریزم برچه شکل و کۉرینیشلریده افغانستان و بوتون دنیا تینچلیگی همده خوفسیزلیگی اوچون اېنگ جدّي تهدیدلردن بیری اېکنینی تأکیدلهدی.
بیرلشگن ملتلر تشکیلاتی خوفسیزلیک کېنگشی اعضالری اوشبو هجومنی کېسکین قارهلب، افغانستان و چیندن بۉلگن قربانلر عایلهلریگه همدردلیک بیلدیردی.
کېنگش ترورچیلیک حرکتلرینی تشکیل اېتگنلر، مالیهلشتیرگنلر و قۉللب-قوّتلهگنلرنی جوابگرلیککه تارتیش همده اولرنی عدالت آلدیگه چیقریش ضرورلیگینی تأکیدلهدی.
بیرلشگن ملتلر تشکیلاتی خوفسیزلیک کېنگشی اعضالری دولتلرنی خلق ارا حقوق و خوفسیزلیک کېنگشینینگ تېگیشلی استخباراتلری دایرهسیدهگی مجبوريتلریگه موافق، اوشبو مسألهده برچه تېگیشلی ادارهلر بیلن فعال همکارلیک قیلیشگه چقیردی.
دوشنبه کونی توشدن کېین کابلنینگ شهرنو منطقهسیدهگی «گُلفروشلیک» کۉچهسیده جایلشگن بیر رستورانتده پارتلش یوز بېردی.
طالبلر معلوماتیگه کۉره، پارتلش افغانستان و چین یشاوچیلری تامانیدن بیرگهلیکده باشقریلگن رستورانتده یوز بېرگن.
طالبلر پولیسی کابلده مذکور پارتلش عاقبتیده آلتی نفر افغانستانلیک و بیر نفرچینلیک اۉلگنینی معلوم قیلدی. ینه۱۳ کیشی، جملهدن بیر نېچه نفر چین یشاوچیسسی یرهلنگن.
داعش گروهی بیانات نشر قیلیب، اوشبو پارتلش اوچون مسوولیتنی اۉز ذمّهسیگه آلدی و چین یشاوچیلری تۉپلنگن پیتده خودکش هجومچی اۉزیدهگی پارتلاوچی مادّهلرنی پارتلهتگنینی بیلدیردی.
