رویترز خبر آژانسیگه کۉره، قیش فصلی کېلیشی و خلق ارا یاردم نینگ کمهییشی بیلن افغانستاندهگی آچلیک بحرانی کوچهیگن.
افغانستاندهگی جهان آزیق-آوقت دستوری باشلیغی جان آیلیف، رویترزگه ایتیشیچه، اۉتگن ییل افغانستانده اېنگ کتّه آچلیک تۉلقینی قید اېتیلگن، اما جاري ییل بو وضعیت ینه-ده آغیرلشیشی کوتیلماقده.
اونینگ قۉشیمچه قیلیشیچه، جاري ییل اوچ میلیون کیشی آچلیککه دوچ کېلگنلر صفیگه قۉشیلهدی و ۲۰۰مینگ باله آغیر سورونکهلی آچلیکدن اذیت چېکهدیگن بالهلر رۉیخطیگه کیریتیلهدی.
جهان آزیق-آوقت دستوری باشلیغی شونینگدېک، قیش کېلیشی بیلن افغانستانده ایش اۉرینلری کمهیگن، شو بیلن بیرگه ایران و پاکستاندن دېپورت قیلینگن مهاجرلر حسابیگه مملکت اهالیسی۱۰ فایزگه آشگن.
اونینگ ایتیشیچه، کۉپلب مهاجر ایران و پاکستانده ایشلهگن و افغانستانگه پول یوبارگنلر.
«او پوللر افغانستان اوچون قوتقرووچی ارقان بۉلگن»، دېیدی جهان آزیق-آوقت دستوری باشلیغی.
رویترز شونینگدېک، اېران و پاکستاندن چیقریلگن بیر نېچه عایلهلر بیلن صحبت قیلگن.
اوشبو عایلهلردن بیرینینگ باشلیغی، اولر «اۉلیمگه راضی بۉلگن» نقطهگه یېتیشگنینی ایتگن.
رویترز خبریگه کۉره، بو عایلهلر بیر پنجره آستیده یشهماقده و اولرنینگ کونلیک یگانه طعامی قوریتیلگن نان و چایدن عبارت.
رویترز خبریگه کۉره، جهان آزیق-آوقت دستوری اَیریم محتاجلرگه یاردم ترقتماقده، اما خلق ارا یاردم کمهیگنی سببلی برچه محتاجلرگه یاردم یېتکزیش امکانی یۉق.
بیرلشگن ملتلر تشکیلاتیگه کۉره، جاري ییلده افغانستانده۱۷ میلیون کیشی آغیر آچلیک بیلن یوزلشهدی و انسانپرورلیک یاردمیگه محتاج بۉلهدی.
بیرلشگن ملتلر تشکیلاتی نینگ انسانپرورلیک یاردملرینی موافقلشتیریش اداره بو شخصلر اوچون۱.۷۲میلیارد دالر مبلغ سۉرهگن.
خلق ارا یاردم تشکیلاتلری بیر نېچه بار ایران و پاکستاندن۲.۵میلیوندن آرتیق مهاجرنینگ چیقریلیشی و گلوبل انسانپرورلیک یاردمی نینگ کمهییشی بیلن افغانستاندهگی انساني بحران کوچهیگن و آچلیک آرتگن.
