«افغانستاننی قوتقریش ملي قرشیلیک کېنگشی» مملکتنینگ هندستاندهگی اېلچیخانهسینی طالبانگه تاپشیریش «شاشیلینچ قرار و افغانستان نینگ عینی حقیقتلریگه ضد»دیر.
اوشبو کېنگش تیناوون (شنبه،۲۷ جدی) نشر قیلگن بیاناتیده «طالبان بیلن علاقهلر و مناسبتلرنی نارمللشتیریش، بو اېکسترېمیستیک و تروریستیک یۉنهلیشگه اېگه گروه بۉلیب، افغانستان خلقینی نمایندهلیک قیلمهیدی، شونینگدېک هندستان نینگ افغانستان خلقی بیلن چوقور و اوزاق مدتلی مناسبتلرینی حسابگه آلگنده، کوتیش و امیددن ییراقدیر.»
کېنگشنینگ قۉشیمچه قیلیشیچه: «طالباننی تن آلیش و اولر بیلن ملاقات قیلیش منطقوي و خلق ارا مقیاسده سلبي و قَیته تیکلب بۉلمهیدیگن خوفسیزلیک و اجتماعي عاقبتلرنی کېلتیریب چیقرهدی، شونینگدېک، برقرار تینچلیک و خلق ارا قاعدهلر و تمایللرگه اساسلنگن ترتیبگه اېریشیش بۉییچه جهان همجمعیتی نینگ سعی-حرکتلرینی ایزدن چیقرهدی.»
«افغانستاننی قوتقریش ملي قرشیلیک کېنگشی» شونینگدېک: «بیز هندستان حکومتیدن، افغانستان خلقی بیلن اوزاق مدتلی دۉستلیک علاقهلرینی حسابگه آلگن حالده، افغانستان خلقی و اولرنینگ حقیقي و نمایندهلری بیلن همکارلیکنی دوام اېتتیریشینی کوتهمیز» دیگن.
کېنگش دنیا جماعه چیلیگیدن افغانستان نینگ آغیر وضعیتی بۉییچه مسوولیتلی حرکت قیلیشی و خلق ارا حقوق و افغانستان خلقی نینگ ارادهسینی حسابگه آلگن احتیاطکار و مسوولیتلی یاندشوونی قۉللشنی سۉرهگن.
هندستان اۉتگن ییل اکتبر آییده طالبان تشقی ایشلر وزیری امیرخان متقینینگ سفریدن سۉنگ، افغانستان اېلچیخانهسینی اوشبو گروهگه تاپشیرگن.
طالبان یقینده اۉز تشقی ایشلر وزیرلیگی نینگ یوقاری مرتبهلی خادیمی نور احمد نورنی اېلچیخانه باشلیغی صفتیده دهلیگه یوبارگن.
