آلمان ایچکی ایشلر وزیرلیگی جنایت قیلگن ینه بیر مهاجر افغانستانگه دېپورت قیلینگنینی تصدیقلهدی.
«بیلد» گزېتهسی خبریگه کۉره، آلمان ایچکی ایشلر وزیرلیگی مطبوعات سۉزلاوچیسی اونینگ مونیخ دن کابلگه رېجهلشتیریلگن پرواز آرقهلی یوباریلگنینی ایتگن.
وزیرلیک سۉزلاوچیسی نینگ سۉزلریگه کۉره، اوشبو شخص «جنسي زۉروانلیک و آغیر تن جراحتی یېتکزیش» جنایتلری اوچون محکمه قیلینگن.
بو ۲۰۲۶-ییلده آلماندن افغانستانگه جنایتچی مهاجرلرنی دېپورت قیلیش بۉییچه ایکّینچی حالت حسابلنهدی.
آلمان جاري ییل باشیده هم جنایت صادر اېتگن مهاجرنی افغانستانگه چیقریب یوبارگن اېدی.
آلمان ایچکی ایشلر وزیری الکساندر دوبرینتنینگ ایتیشیچه، جنایتچیلرنی افغانستانگه دېپورت قیلیش دایمي جریانگه ایلنیشی کېرهک.
اونینگ تأکیدلشیچه، جنایت صادر اېتگن هر قندهی مهاجر آلماننی ترک اېتیشی شرط.
آلمان ایلگری قطر واسطهچیلیگیده تورلی جنایتلر اوچون محکمه قیلینگن مهاجرلرنی افغانستانگه دېپورت قیلیب کېلگن.
اما مونخ و برلیندهگی افغانستان سیاسي نمایندهلیگیده طالبان نینگ ایکّی نمایندهسی قبول قیلینگچ، اوشبو جریان اېندی بېواسطه طرزده عملگه آشیریلماقده.
