هرات ولایتینینگ اَیریم اهالیسی آزیق-آوقت محصولاتلری نرخلری کېسکین آشگنی و بو حالت عایلهلرگه توشهیاتگن اقتصادی باسیمنی کوچهیتیرگنینی اَیتماقده.
هرات اهالیسی، خصوصاً، برنج و یاغ نرخلری ۵۰ فایزدن آرتیق آشگنینی تأکیدلهماقده.
هراتلیکلردن بیری خلیل احمدنینگ ایتیشیچه، ایلگری بیر بوجی اینگ یخشی برنج ایکّی مینگ افغاني بۉلگن بۉلسه، حاضرده اوچ مینگ۴۰۰ افغانيدن آرتیق نرخده ساتیلماقده.
اونینگ قۉشیمچه قیلیشیچه، یاغ نرخی هم سېزیلرلی درجهده آشگن. بېش لیترلیک یاغ بوتلی ۴۰۰ افغانيدن ۷۰۰–۷۵۰ افغانيگچه کۉتریلگن.
هرات اهالیسی آزیق-آوقت نرخلرینینگ آشیشیگه سبب صفتیده تأمیناتنینگ کمهییشی و پاکستان بیلن چېگره یۉللری نینگ یاپیلگنینی کۉرستماقده.
اوچ آیدن آرتیق وقتدن بېری افغانستان و پاکستان اۉرتهسیدهگی چېگره اۉتیش یۉللری یاپیق بۉلیب، ایکّی دولت اۉرتهسیدهگی سودا تۉختهب قالگن.
پاکستان حکومتی بو اۉتیش یۉللرینی بیر نېچه کون دوام اېتگن تۉقنهشوولر و طالبان بیلن سیاسي کېسکینلیک آرتیدن یاپگن.
چېگره اۉتیش یۉللری یاپیلگچ، مملکت نینگ باشقه شهرلریده هم آزیق-آوقت محصولاتلری و باشقه اساسي تاورلر نرخلری سېزیلرلی درجهده آشگن.
