آلمان باش وزیری فرید ریش مرتس، ایراندهگی ناراضیلیک نمایشلریگه اشاره قیلیب، اوشبو مملکت حکومتی اۉزینینگ سۉنگگی کونلری و هفتهلرینی باشدن کېچیرهیاتگنینی ایتدی.
حاضرده رسمي سفر بیلن هندستانده بۉلگن فرید ریش مرتس، بو سۉزلرنی بوگون (سهشنبه، ۲۳ جدی) شو مملکتده بیلدیردی.
آلمان باش وزیری شوندهی دېدی: «اگر بیرار رژیم حاکمیتنی فقط زۉرآورلیک آرقهلی سقلب توره آلسه، او عملده اۉز یکونیگه یېتگن بۉلهدی.»
اونینگ قۉشیمچه قیلیشیچه: «مېنیمچه، حاضر بیز اوشبو رژیم نینگ (اېران حکومتی) سۉنگگی کونلری و هفتهلریگه گواه بۉلیهپمیز.»
فرید ریش مرتس نینگ ایتیشیچه، ایران نینگ عملدهگی حکومتی سیلاوي مشروعیتگه اېگه اېمس و حاضر خلق اونگه قرشی «قۉزغآلان» کۉترگن.
آلمان باش وزیری بوندن اوّل هم ایراندهگی جاري ناراضیلیکلر یوزهسیدن فکر بیلدیرگن و نمایشچیلرگه قرشی «شفقتسیز باستیریش»نی قارهلهگن اېدی.
ایرانده ناراضیلیک نمایشلری۱۶ کون اوّل ارز نینگ نرخی آشیشیگه قرشی اعتراض صفتیده باشلنگن، بیراق تېز آرهده کېنگهییب، حکومتگه قرشی حرکتگه ایلنگن.
ایران حکومتی بېش کوندن بېری بوتون مملکت بۉیلب اینترنتنی اوزیب قۉیگن. انسان حقوقلری تشکیلاتلری اېسه نمایشچیلرگه نسبتاً کېنگ کۉلملی سرکوبلری بارهسیده جدّي خواطر بیلدیرماقده.
