افغانستان مطبوعاتنی قۉللب-قوّتلش تشکیلاتینینگ خبر بېریشیچه، طالبلر ناظره رشیدی اسملی محلي ژورنالیستنی قندوز ولایتیده قماققه آلگن.
تشکیلاتنینگ معلوم قیلیشیچه، خانم رشیدی اۉتگن هفتهنینگ سهشنبه کونی (۱۶ جدی) طالبان تامانیدن حبسگه آلینیب، نامعلوم جایگه آلیب کېتیلگن.
ژورنالیست نینگ عایلهسی افغانستان مطبوعاتنی قۉللب-قوّتلش تشکیلاتیگه ایتیشیچه، او گناهسیز و هېچ قندهی ناقانوني فعالیت بیلن شغللنمهیدی.
تشکیلاتنینگ یازیشیچه، رشیدی نینگ عایلهسیده اېرکک سرپرستی یۉق و او کیچیک اکه-اوکهلری و آپه-سینگیللریگه قرهش مسوولیتینی اۉز ذمّهسیگه آلگن.
تشکیلات ژورنالیستنینگ حبسگه آلینیشینی قارهلب، طالباندن اونی امکانی باریچه تېز و شرطسیز آزاد قیلیشنی همده حبسگه آلیش نینگ قانوني سببلرینی آچیق-آشکاره اعلان قیلیشنی سۉرهگن.
شونینگدېک، تشکیلات خلق ارا سۉز اېرکینلیگینی حمایه قیلووچی نهادلر و انسان حقوقلری تشکیلاتلریدن بو ایشنی جدّي تېکشیریش و افغانستان ژورنالیستلرینینگ حبسگه آلینیشی و دایمي تعقیبی نینگ آلدینی آلیش بۉییچه عملي چاره-تدبیرلر کۉریشنی سۉرهگن.
طالبان افغانستانده حاکمیتنی قَیته قۉلگه کیریتگنیدن بېری مدیا و ژورنالیستلر فعالیتیگه کېنگ قمراولی چېکلاولر اۉرنهتگن. بو گروه بیر نېچه مرته ژورنالیستلرنی تورلی جایلردن حبسگه آلیب، قماققه تشلهگن.
