طالبلر مدافعه وزیرلیگی «تقدیری نامعلوم» دېب اتهلگن مجاهدلرنی اوشبو گروه اوردوسی صفیگه قبول قیلیشینی معلوم قیلدی.
وزیرلیک بوگون (شنبه، ۲۰جدی) اعلان قیلگن بیاناتیده بو شخصلرنی قبول قیلیش طالبان مدافعه وزیری محمد یعقوب مجاهدنینگ «مخصوص بویروغی» اساسیده عملگه آشیریلیشینی بیلدیردی.
طالبان مدافعه وزیرلیگی بیاناتیده ایتیلیشیچه، اوشبو شخصلر گروه نینگ خوفسیزلیک و تازهلش کمیسیونی تامانیدن «ایکّینچی باسقیچدهگی قَیته کۉریب چیقیش» جریانیده تصدیقلنگن بۉلیشی کېرهک.
وزیرلیک بو شخصلردن مملکت مرکزی و ولایتلردهگی مذکور وزیرلیک نینگ یاللش مرکزلریگه رۉیخطدن اۉتیش اوچون مراجعت قیلیشنی سۉرهدی.
طالبان افغانستانده حاکمیتنی قَیته قۉلگه کیریتگچ، اۉزی نینگ سابق کوچلرینی اوردو و پولیس توزیلمهلریگه قبول قیلگن اېدی.
بیراق، طالبان نینگ خوفسیزلیک و تازهلش کمیسیونی اوردو و پولیس صفیدهگی کوچلرنی تېکشیرگنیدن سۉنگ، گروه نینگ اَیریم سابق اعضالرینی صفدن چیقرگن.
اېندیلیکده اېسه، قَیته تېکشیروودن سۉنگ، طالبان نینگ اَیریم سابق اعضالری اوشبو گروه اوردوسیگه قبول قیلینیشی اوچون خوفسیزلیک و تازهلش کمیسیونسی تامانیدن تصدیقلنگنی کۉرینماقده.
