پاکستان تشقی ایشلر وزیرلیگی سۉزلاوچیسی طاهر اندرابی، اگر طالبان ترورچیلیک مسألهسینی حل قیلسه، ایکّی تامانلهمه علاقهلرنی یخشیلش اوچون عجایب امکانیت موجودلیگینی ایتدی.
او شونینگدېک، پاکستان نینگ افغانستان بیلن ترورچیلیکدن تشقری باشقه هېچ قندهی ایکّی تامانلهمه ضدیتگه اېگه اېمسلیگینی بیلدیردی.
اندرابینینگ قۉشیمچه قیلیشیچه، «پاکستان افغانستان بیلن دشمنلیک قیلماقچی اېمس. بیز نینگ افغانستاندن طلبیمیز جوده عادي. بو هر بیر ملت نینگ اساسي مسوولیتیگه ضد بۉلمهگن نرسه؛ ترورچی عنصرلر و افغانستان وطنداشی باشقه دولتلرده ترورچیلیک نینگ بیر قِسمی بۉلمسلیگی کېرهک.»
او: «اسلام آباد بو طلبنی طالبان تامانیدن اۉز حدودیدن فایدهلنمسلیک بۉییچه انیق، اثباتلنهدیگن و یازمه کفالتلر آلینمهگونچه سقلهیدی» دېدی.
اندرابینینگ کۉپهیتیریشیچه «بیزنینگ افغانستان بیلن هېچ قندهی ایکّی تامانلهمه معمایمیز یۉق، فقط ترورچیلیک مسألهسی بار، او افغانستاندن کېلماقده. شو نینگ اوچون بو حرکتلرنی تۉختهتیش بۉییچه یازمه و تصدیقلنیشی ممکن بۉلگن کفالتلر کېرهک.»
اونینگ تأکیدلشیچه: ایکّی تامانلهمه همکارلیک صلاحیتی و افغانستان نینگ منطقوي باغلنیش مرکزیگه ایلنیشی، پاکستان تامانیدن ترورچیلیک بۉییچه یازمه کفالتلر آلینمهگونچه عملگه آشیریلمهیدی.
اندرابی: «مېنیمچه، بوندهی کفالت افغانستان اوچون اۉز مملکتی، اۉزی نینگ دولتینی مستحکملش، ایچکی قانون اوستوارلیگینی تأمینلش، ترقیات و رواجلنیش اوچون یخشی – بو مملکتنی تۉلیق اقتصادي، تجاري و باغلنیش امکانیتیگه اېگه جانلی و فعال دولت صفتیده رواجلنتیریشگه خدمت قیلهدی» دېب ایتگن.
اسلام آباد، طالبان افغانستانگه قَیتگندن کېین پاکستانده بېقرارلیک آشگن.
اسلامآباد نینگ معلوماتیگه کۉره، طالبان افغانستانده پاکستانلیک قوراللی گروهلرگه، جملهدن پاکستان طالبان حرکتیگه (تیتیپی) پناه بېرگن و بو گروهلر افغانستان توپراغیدن پاکستانگه قرشی فایدهلنماقده.
میزان اۉرتهسیده، پاکستان اوردوسی افغانستان توپراغیگه هجوم قیلگن. بو هجوم بیر هفتهلیک چېگره تۉقنهشوویگه آلیب کېلگن، اما قطر و تورکيه واسطهچیلیگیده ایکّی تامانلهمه مذاکرهلر تۉختهتیلگن و تامانلر مذاکره چوکیسیگه قَیتگن، اما بو مذاکرهلر حاضرگچه نتیجه بېرمهگن.
اسلام آباد و کابل اۉرتهسیدهگی مناسبتلر حلی هم ساووق، و افغانستان-پاکستان چېگرهسی همده سودا تۉختهتیلگن.
شو بیلن بیرگه، طالبان نینگ هندستان، پاکستان نینگ عنعنوي رقیبی بیلن مناسبتلری کېنگهیگن.
شونگه قرهمهی، پاکستان تشقی ایشلر وزیرلیگی سۉزلاوچیسی، بو مملکت هندستانگه نسبتاً باشقه دولتلر بیلن ضدیتده اېمس دېگن.
اندرابی نینگ قۉشیمچه قیلیشیچه، پاکستان طالبان بیلن اوچ تامانلهمه مناسبتلر (پاکستان، چین و افغانستان) دایرهسیده ملاقات قیلماقده.
او شونینگدېک، پاکستاننینگ طالبان بیلن دیپلوماتیک کاناللری آچیق و رسمي دیپلوماتیک المشوولر دوام اېتهیاتگنینی بیلدیردی.
