طالبلر ایچکی ایشلر وزیرلیگی تخار ولایتی، چا آب اولسواللیگیده کان قزیب آلیشگه قرشی ناراضیلیک نمایشیده اوچ کیشی اۉلدیریلگنینی تصدیقلهدی.
وزیرلیک سۉزلاوچیسی عبدالمتین قانع نینگ ایتیشیچه، چاآب اولسواللیگی اهالیسی بیلن آلتین یوویش شرکتی نمایندهلری اۉرتهسیده تۉقنهشوو یوز بېرگن. اوشبو تۉقنهشووده محلي اوچ کیشی و شرکت خادمی اۉلدیریلگن، بېش کیشی یرهلنگن.
او نینگ قۉشیمچه قیلیشیچه، کان قزیب چیقرووچی شرکت نینگ بیر خادمی و بیر محلي اهالی قاتللیکده عیبلنیب حبسگه آلینگن.
قانع، اوشبو شرکت نینگ فعالیتی تۉختهتیلگنینی و تېرگاو جریانی نینگ دوام اېتهیاتگنینی معلوم قیلدی.
چا آب اولسواللیگی اهالیسی آلتین کانلرینی حددن تشقری قزیب آلیش و سوو منبعلریگه ضرر یېتکزیلهیاتگنیگه قرشی ناراضیلیک بیلدیرگن.
محلي منبعلرنینگ آلدینراق ایتیشیچه، بو ناراضیلیک طالبان تامانیدن باستیریلگن، نتیجهده اوچ کیشی اۉلگن و آلتی کیشی یره لنگن.
منبعلرشونینگدېک، طالبان بیر اعضاسی هم نمایشچیلر تامانیدن اۉلدیریلگنینی بیلدیرگن.
منبعلرگه کۉره، نمایشچیلر کان قزیب چیقرووچی شرکت ملکینی هم یاقیب یوبارگن.
طالبلر ایچکی ایشلر وزیرلیگی سۉزلاوچیسی اوشبو نمایشلرنی باستیریشده طالبان کوچلری اشتراکی حقیده هېچ نرسه ایتمهگن.
طالبان افغانستان نینگ یېر آستی منبعلرینی، جملهدن تخار و بدخشاندهگی آلتین کانلرینی کېنگ مقیاسده قزیب آلیشگه کیریشگن. بو حرکت اهالی آرهسیده ناراضیلیککه سبب بۉلماقده.
شونی تأکیدلش کېرهککی، جاري ییل یازیده طالبلر بدخشان ولایتیدهگی کوکنار اېکینلرینی یۉق قیلیشگه قرشی چیققن اهالی ناراضیلیگینی هم باستیرگن. بیرلشگن ملتلر تشکیلاتی معلوماتلریگه کۉره، اوشبو باستیریشده کمیده۱۰نفر نمایشچی اۉلدیریلگن.
