خبرلرگه کۉره، ایرانده قیمتلیک و حکومتگه قرشی ناراضیلیک نمایشلری اۉنینچی کونی هم بیر نېچته شهرلرده دوام اېتدی.
تهران، ایلام، همدان، مشهد، شراز و بروجرد ولایتلری همده شهرلریده ناراضیلیک نمایشلری اۉتکزیلگنی حقیده خبرلر بار.
ایران نینگ اَیریم حکومتگه یقین یېتکرمهلر هم بو نمایشلرگه اعتبار قرهتگن.
فارس اخبارات آژانسینینگ یازیشیچه، تهران بازاری قیمتلیککه قرشی ناراضیلیک ییغینیگه گواه بۉلگن.
ترقهلگن ویدیولرده تهران بازاریدهگی سوداگرلر «دیکتاتورگه اۉلیم» دېگن شعارلرنی ایتهیاتگنی و اولرنینگ ناراضیلیگی خوفسیزلیک کوچلری تامانیدن باستیریلهیاتگنی کۉرینهدی.
فارسنینگ یازیشیچه، سهشنبه کونی کېچقورون ایلام ولایتی نینگ آبدانان شهریده اقتصادي مسألهلر مرکزیده ناراضیلیک نمایشی بۉلیب اۉتگن، نمایش سۉنگیده تۉقنهشوولر یوز بېرگن و جماعت ملکیگه ضرر یېتکزیلگن. پولیس نمایشچیلرنی ترقهتیش اوچون کۉزدن یاش آقیزووچی گاز ایشلهتگن.
ترقهلگن ویدیولر آبدانانده نمایشچیلر گوروچ قاپلرینی ییرتیب، ایچیدهگینی ساچیب یوبارهیاتگنینی کۉرسهتهدی.
فارس ینه بیر خبریده ایلام ولایتی نینگ ملکشاهی اولسواللیگیده ناراضیلیکلر چاغیده بیر نفر پولیس خادمی «ترتیبسیزلیکچیلر» تامانیدن اۉق آتیب اۉلدیریلگنینی یازگن.
خبرلرگه کۉره، سۉنگگی ناراضیلیکلرده اۉلگن ایکّی کیشی نینگ دفن مراسمی هم زۉرآورلیک بیلن کېچگن.
مذکور حکومتگه یقین نشر همدان و اصفهانده هم قیمتلیککه قرشی ناراضیلیک نمایشلری بۉلیب اۉتگنینی خبر قیلگن. سایتنینگ یازیشیچه، بو ایکّی ولایتده نمایشچیلر ترتیبسیزلیکلرنی قارهلهگن.
ایران حکومتی حکومتگه قرشی ناراضیلیکلرنی «ترتیبسیزلیکلر» دېب اتماقده.
ایران رهبری علی خامنهای سۉنگگی نطقیده مسووللر نمایشچیلر بیلن گپلشیشی کېرهکلیگینی، اما «ترتیبسیزلیکچیلر» بیلن گپلشیش فایدهسیز اېکنینی و اولرنی اۉز جاییگه قۉییش لازملیگینی ایتگن.
سۉنگگی ناراضیلیکلر باستیریش و زۉرآورلیک بیلن کېچماقده.
انسان حقوقلری فعاللری نشری بۉلگن هرانا اخبارات آژانسی نینگ یازیشیچه، حاضرگه قدَر کمیده 34 نفر نمایشچی و ایکّی نفر خوفسیزلیک خادمی جان بېرگن، ینه 2 مینگ 76 کیشی حبسگه آلینگن.
بو ناراضیلیکلر خلق ارا مقیاسده هم کېنگ عکس المللرگه سبب بۉلدی.
امریکا جمهور رییسی دونالد ترهمپ ایران اگر تینچ نمایشچیلرگه اۉق اوزسه، امریکا اولرنی قوتقریش اوچون کېلیشینی آگاهلنتیرگن.
ایران رسميلری ترامپ نینگ بو بیاناتلرینی مملکت ایچکی ایشلریگه ارهلشوو دېب بهالب، قارهلهگن.
