پاکستان اوردوسی مطبوعات سۉزلاوچیسی محمد شریف چودری طالباننینگ هندستانگه یقینلشیشیگه اشاره قیلیب، بو گروه حاضر «نارندرا مودی» ناملی ینگی قهرمان تاپگنینی ایتدی. نارندرا مودی هندستان باش وزیری حسابلنهدی.
جیو نیوز خبریگه کۉره، چاودری بوگون (سهشنبه، ۱۶جدی) بۉلیب اۉتگن مطبوعات انجمنیده اگر طالبان افغانستانده هندستان بیلن بیرگه پاکستانگه قرشی حرکت قیلماقچی بۉلسه، اسلام آباد بونگه تیار اېکنینی ایتگن.
طالبان سۉنگگی پیتلرده اۉزینینگ اوزاق ییللیک حاميسی بۉلگن پاکستان بیلن مناسبتلری ترنگلشگن بیر پیتده، هندستان بیلن علاقهلرینی کېنگهیتیرماقده.
میزان آیینینگ اۉرتهلریده، طالبان تشقی ایشلر وزیری امیرخان متقي دهلیده بۉلگن وقتده، پاکستان اوردوسی افغانستان توپراغیگه هجوم قیلگن. اوشبو هجوم طالبان و پاکستان حربيلری اۉرتهسیده بیر هفته دوام اېتگن چېگره تۉقنهشوویگه سبب بۉلگن. گرچه قطر و تورکيه واسطهچیلیگیده بو تۉقنهشوو تۉختهتیلگن و ایکّی تامان مذاکره چوکیسی گه اۉتیرگن بۉلسه-ده، حاضرگچه بو مذاکرهلر نتیجه بېرمهگن. اسلام آباد و کابل اۉرتهسیدهگی مناسبتلر هنوز ساووق، افغانستان-پاکستان چېگرهلری و تجارت علاقهلری هم تۉختهتیلگن.
اسلام آبادنینگ تأکیدلشیچه، طالبان افغانستانده حاکمیتگه قَیتگچ، پاکستاندهگی بېقرارلیک کوچهیگن.
پاکستان اوردوسی سۉزلاوچیسی بوگون ایتیشیچه، 2025-ییلده پاکستانده یوز بېرگن خوفسیزلیک حادثهلرینینگ 70 فایزی افغانستان بیلن چېگرهداش خیبرپختونخوا ایالتیده یوز بېرگن.
پاکستاننینگ ایتیشیچه، طالبان افغانستانده پاکستانلیک قوراللی گروهلرگه، جملهدن تحریک طالبان پاکستان (تیتیپی)گه باشپناه بېرماقده و بو گروهلر افغانستان حدودیدن پاکستانگه قرشی فایدهلنماقده.
اسلام آباد طالباندن تیتیپی و باشقه پاکستانلیک گروهلرگه قرشی چارهلر کۉریشنی طلب قیلماقده.
طالبان اېسه افغانستانده ترورچی گروهلر موجودلیگینی انکار اېتیب، هېچ کیمگه افغانستان توپراغیدن باشقه دولتلرگه قرشی فایدهلنیشگه رخصت بېرمسلیگینی اَیتماقده.
چودری بوگون ینه تکرارلب، طالبان نظارتیدهگی افغانستان منطقهده «ترورچیلیک عملیاتلری مرکزی»گه ایلنگنینی و «برچه ترورچی گروهلر افغانستانده جایلشگن همده شو یېرده تربیهلنماقده»، دېدی.
او، شونینگدېک، طالبان دوحه کېلیشوویده افغانستانده تروریزم ایلدیزی بیلن یۉق قیلینیشینی کفالتلهگنینی، اما مملکت هنوز «فتنه خوارج» و «فتنه هندستان» مرکزی بۉلیب قالهیاتگنینی تأکیدلهدی.
پاکستان اوردوسی و رسميلری «فتنه خوارج» و «فتنه هندستان» اتَمهلرینی ماس روشده تحریک طالبان پاکستان (تیتیپی) و «بلوچ آزادلیک اوردوسی» اوچون ایشلهتهدی.
اسلام آباد هندستاننی تیتیپی کبی پاکستان ایچیدهگی گروهلرنی قۉللب-قوّتلشده عیبلب کېلهدی.
