بیرلشگن ملتلر تشکیلاتی نینگ آزیق-آوقت و اېکینچیلیک بۉییچه تشکیلاتی (فائو) نینگ معلوم قیلیشیچه، افغانستانده یاغینگرچیلیک موسمی عادتدهگیدن کۉره قوروقراق و ایسّیقراق طرزده باشلنگن.
اوشبو تشکیلاتگه کۉره،« لانینیا» اقلیمي حادثهسیگه عاید موسمي پراگنازلر قیش نینگ باشیده افغانستان نینگ اکثریت منطقهلریده اۉرتهچه کۉرستکیچدن کم یاغینگرچیلیک و اۉرتهچهدن یوقاری حرارت بۉلیش احتمالی یوقاری اېکنینی کۉرستماقده.
(فائو) گزارشیده قید اېتیلیشیچه، ۲۰۲۵- ییل نوامبریدن ۲۰۲۶ییل جنوریگچه بۉلگن دور اوچون بیر نېچته مۉدللر اساسیدهگی یاغینگرچیلیک پراگنازلری، مملکت نینگ کۉپ منطقهلریده، اینیقسه شمالي، شِمال-شرقي و مرکزي تاغلی حدودلرده، یاغین مقداری اۉرتهچهدن پست بۉلیشی دوام اېتیشینی کۉرستماقده.
حساباتگه کۉره، اوشبو یاغین موسمیده قار تۉپلنیشی جوده کم.
(فائو) نینگ قۉشیمچه قیلیشیچه، گلوبل اېکینچیلیک مانیترینگ قیلیش تشبثی ۲۰۲۵\۲۶-ییللر قار موسمی سۉنگگی۲۵ ییل ایچیدهگی اېنگ پست «قارگه تېنگ سوو مقداری» بیلن باشلنگنینی قید اېتگن.
(فائو) نینگ تأکیدلشیچه، بو حالت هیدرولوژیکی جهتدن جدّي تنقیصلیکنی انگلهتهدی و بهارگی سوغاریش سوو منبعلری اوچون مهم عاقبتلرگه آلیب کېلیشی ممکن، اینیقسه قار اېریشیگه اساسلنگن دریا تیزیملریگه باغلیق سوغاریلهدیگن بوغدای یېتیشتیریلهدیگن منطقهلرده.
مذکور تشکیلات شونینگدېک، حاضرده قارگه تېنگ سوو مقداری جوده پست اېکنینی و موسمي پراگنازلر قورغاقچیلیک نینگ دوام اېتیشیدن درَک بېرهیاتگنینی انابتگه آلگن حالده، ۲۰۲۶-ییل بهاری اوچون سوغاریش سووی نینگ یېترلیلیگی بارهسیدهگی خواطرلر آرتیب بارهیاتگنینی بیلدیرگن.
افغانستان بیر نېچه ییلدن بېری آغیر قورغاقچیلیکنی باشدن کچیرماقده. اوشبو بحران دهقانلر و چاروادارلرگه جدّي ضرر یېتکزیب، قشّاقلیک و آچلیک نینگ کېنگهییشیگه سبب بۉلگن.
بیرلشگن ملتلر تشکیلاتی تامانیدن اعلان قیلینگن آزیق-آوقت خوفسیزلیگی باسقیچلرینی کومپلېکس تصنیفلش (آیسیپی) بۉییچه اېنگ سۉنگگی گزارشیگه کۉره، کېلهیاتگن قیش موسمیده۱۷.۴میلیون کیشی آغیر آزیق-آوقت تنقیصلیگیگه دوچ کېلیشی کوتیلماقده. بو حالت افغانستانگه یۉنهلتیریلگن بشری یاردم حجمی کمهییب بارهیاتگن بیر پیتده یوز بېرماقده.
