منبعلرگه کۉره، تخار ولایتینینگ چاآب اولسواللیگیده بۉلیب اۉتگن ناراضیلیک نمایشلری چاغیده طالبان تامانیدن اوچ نفر نمایشچی اۉلدیریلگن، ینه آلتی نفری یرهلنگن.
بیر نېچه کوندن بویان چاآب منطقهسی اهالیسی آلتین کانلرینینگ حددن تشقری قزیب آلینیشی و بو جریاننینگ سوو منبعلریگه ضرر یېتکزهیاتگنیگه قرشی ناراضیلیک بیلدیرماقده.
منبعلرنینگ ایتیشیچه، بو ناراضیلیک نمایشلری تیناوون (دوشنبه، ۱۵جدی) زۉروانلیککه ایلنیب کېتگن.
اطلاعات روزگه یېتیب کېلگن ویدیولرده نمایشچیلرنینگ قۉللریده تیاق و بېلکورهکلر بارلیگی کۉرینهدی.
اجتماعي ترماقلرده ترقهلگن بیر ویدیوده طالبان اعضالریدن بیری نمایشچیلرگه قرهته اۉق اوزهیاتگن پیتده نمایشچیلر تامانیدن دۉپپاسلنهیاتگنی عکس اېتگن.
منبعلرگه کۉره، نمایشچیلر بیلن طالبان اۉرتهسیدهگی تۉقنهشوو دوامیده اوچ نفر نمایشچی طالبان تامانیدن اۉلدیریلگن، آلتی نفری یرهلنگن.
تصدیقلنمهگن خبرلرگه کۉره، بیر نفر طالبان اعضاسی هم نمایشچیلر تامانیدن اۉلدیریلگن.
منبعلر شونینگدېک، نمایشچیلر کان قزیب آلووچی شرکتگه تېگیشلی مال-ملکنی یاقیب یوبارگنینی بیلدیرگن.
تخاردهگی طالبان محلي رسميلری بو ناراضیلیکلر یوزهسیدن هېچ قندهی ایضاح بېرمهیپتی. طالبان نینگ تخار ولایتی امنیه قوماندانلیگی مطبوعات سۉزلاوچیسی اطلاعات روز خبرچیسی نینگ مراجعتیگه جواب بېرمهگن.
طالبان سۉنگگی پیتلرده افغانستان نینگ یېر آستی بایلیکلرینی، جملهدن تخار و بدخشاندهگی آلتین کانلرینی کېنگ مقیاسده قزیب آلیشگه کیریشگن. بو اېسه محلي اهالی ناراضیلیگیگه سبب بۉلماقده.
تأکیدلش جایزکی، طالبان جاري یازده بدخشان ولایتیده کۉکنار اېکینلری نینگ یۉق قیلینیشیگه قرشی چیققن اهالی ناراضیلیگینی هم کوچ بیلن باستیرگن. بیرلشگن ملتلر تشکیلاتی معلوماتلریگه کۉره، اوشبو باستیریش جریانیده کمیده ۱۰ نفر نمایشچی طالبان تامانیدن اۉلدیریلگن.
