چین و پاکستان تشقی ایشلر وزیرلری اۉرتهسیدهگی یېتّینچی استراتژیک ملاقات نینگ قۉشمه بیاناتیده؛ اولر «طالبان حکومتینی کېنگ قمراولی سیاسي چهار چوب یرهتیشگه، ملایم سیاست یوریتیشگه، رواجلنیشگه اعتبار قرهتیشگه، قۉشنی دولتلر بیلن یخشی قۉشنیچیلیک علاقهلرینی سقلشگه و افغانستانگه برقرار رواجلنیش و خلق ارا همجميتگه قۉشیلیش یۉلیده یاردم کۉرسهتیشگه اوندهش اوچون دنیا جماعه چیلیگی بیلن همکارلیک قیلیشلرینی بیلدیرگنلر»
تامانلر شونینگدېک، افغانستان مسألهسیده اۉزارا یقین علاقهلر و موافقلیکنی سقلشگه کېلیشیب آلدیلر.
چین و پاکستان تشقی ایشلر وزیرلری افغانستانده جایلشگن برچه ترور تشکیلاتلرینی یۉق قیلیش و اولرنینگ افغانستان توپراغیدن باشقه دولتلرگه قرشی فایدهلنیشی نینگ آلدینی آلیش اوچون انیق و تېکشیریلهدیگن چارهلر کۉریشنی طلب قیلدیلر.
اولر نینگ تأکیدلشیچه، افغانستاندهگی ترور گروهلری منطقوي و گلابل خوفسیزلیک اوچون جدّي تهدید بۉلیب قالماقده.
یېتّینچی استراتیژیک ملاقات کېچه پکینده بۉلیب اۉتدی.
چین طالبان بیلن یقین علاقهگه اېگه، اما پاکستان بو گروه بیلن ضدیتده.
اۉتگن ییل چین طالبان و پاکستان اۉرتهسیدهگی ترنگلیکنی کمهیتیریش و ایکّی تامانلهمه علاقهلرنی رواجلنتیریش مقصدیده واسطهچیلیک قیلگن.
پاکستان نینگ ایتیشیچه، طالبان افغانستانده پاکستانلیک حربي گروهلرگه پناه بېریب، اولر افغانستان توپراغیدن پاکستانگه قرشی فعالیت یوریتماقده.
پاکستان حکومتی بیر نېچه بار طالباندن پاکستانلیک گروهلر، جملهدن پاکستان طالبان حرکتی (تیتیپی)گه قرشی چارهلر کۉریشنی طلب قیلگن، اما طالبان اوشبو گروهلر نینگ موجودلیگینی انکار قیلگن و تیتیپینی پاکستان نینگ ایچکی مسألهسی دېب حسابلهیدی.
