امریکا جمهور رییسی دونالدترامپنینگ ایتیشیچه، ونزوئلا جمهور رییسی نیکلاس مادورو و اونینگ خاتینی حاضر نیویورکگه یۉل آلماقده.
او بوگون (شنبه، ۱۳جدی) امریکا وقتی بیلن فاکس نیوز بیلن تلفون صحبتیده، اولر «»یواساس ایوو جیما» اوروش کېمهسیگه مینیب نیویورک تامان کېتهیاتگنینی معلوم قیلگن.
دونالد ترامپ اوشبو صحبتده نیکلاس مادورونی حبسگه آلیش عملیاتینی «عجایب» دېب اتهدی و اولرنی جانلی روشده کوزهتگنینی ایتهدی.
امریکا جمهور رییسینینگ قۉشیمچه قیلیشیچه، اوشبو عملیات بیر نېچه کون آلدین عملگه آشیریلیشی کېرهک اېدی، لېکن آب-هوا شرایطی بونگه ماس اېمس اېدی.
ترامپ شونینگدېک، بیر هفته آلدین مادورو بیلن گپلشگنینی و اونگه تسلیم بۉلیشی و قرشیلیکنی تۉختهتیشی لازملیگینی ایتگنینی بیلدیرگن.
بوندن آلدین، امریکا باشقره لاوچیسی پم باندی مادورو و اونینگ خاتینی اوچون نیویورکده محکمه ایشی آچیلگنینی و اولر جنایت جوابگرلیگیگه تارتیلیشینی معلوم قیلگن.
اونینگ قۉشیمچه قیلیشیچه، مادورونینگ اوستیدن قوییدهگی عیبلاولر قۉییلگن:
نرکوتیک تروریزمیده فتنه اویوشتیریش، کوکایین وارد قیلیش و اتوماتیک قورال و پارتلاوچی ماسلمهلرنی سقلش واوشبو قوراللردن امریکاگه قرشی فایدهلنیش رېجهلری.
امریکا بوگون اېرتهلب ونزوئلا پایتختی کاراکاسدهگی بیر قنچه مقصدلرگه هجوم قیلگن.
اوشبو هجوملر آرتیدن دونالد ترامپ نیکلاس مادورو و اونینگ خاتینی نینگ حبسگه آلینگنینی و ونزوئلادن چیقریلگنینی اعلان قیلگن.
امریکانینگ ونزوئلا گه قیلگن هجومی و دولت رهبری همده بیرینچی خانیمنی حبسگه آلیشی جَنوبي امریکا مملکتلری آرهسیده کېنگ تشویش اویغاتگن و تنقید قیلینگن.
