«افغانستان آزادلیک جبههسی»، طالبان ۲۰۲۵-ییل دوامیده افغانستان نینگ سابق۱۲۳ حربي خدمتچیسینی اۉلدیرگنینی معلوم قیلدی.
جبهه بوگون (پنجشنبه،۱۱جدی) اعلان قیلگن گزارشیده، بو رقملر سابق حربيلرنینگ عایلهلری بیلن تصدیقلنگندن سۉنگ جمعلنگنی ایتیلگن.
«افغانستان آزادلیک جبههسی» گزارشیده شونینگدېک، طالبان ۲۰۲۵-ییلده ینه ۱۳۱سابق حربينی حبسگه آلیب، قییناققه سالگنی قید اېتیلگن.
جبهه گزارشیگه کۉره، طالبان سابق حربيلرنی کابل، بلخ، کاپیسا، پروان، بغلان، خوست، پکتيا، پنجشیر، بدخشان، قندهار، جوزجان، فاریاب، سمنگان، هلمند، نورستان، کنر، تخار، غزنی، ننگرهار، باميان، هرات، غور، فراه، بادغیس، قندوز، ارزگان، لغمان، پکتیکا و سرپل ولایتلریده اۉلدیرگن.
«افغانستان آزادلیک جبههسی» نینگ ادعا قیلیشیچه، ایراندن سابق حربيلرنینگ مجبوري دېپورتی کوچهیگنی آرتیدن، طالبان استخباراتی هم اولرنی حبسگه آلیش و اۉلدیریش عملیاتلرینی کېسکینلشتیرگن.
جبهه، شونینگدېک، سابق حربيلرنینگ حبسگه آلینیشی بۉییچه احصایهنی عامهوي اخبارات واسطهلری خبرلری همده طالبان تامانیدن تصدیقلنگن حالتلر اساسیده تۉپلهگنینی بیلدیرگن.
گزارشده ایتیلیشیچه، طالبان سابق حربيلرنی حبسگه آلگچ، اولرنی آغیر قییناقلرگه دچار قیلهدی. جملهدن: برق بیلن قیینش، قیزدیریلگن تېمیرنی بۉیین و تنه نینگ باشقه قِسملریگه باسیش، قۉل-آیاق تیرناقلرینی قیقیچ بیلن سوغوریب آلیش، بیر آیاغیدن آسیب قۉییش، قیزدیریلگن سووگه تشلش، تنه اعضالرینی کېسیش و پۉلاد کېبللر بیلن دۉپپاسلش کبی اصوللر قۉللنیلهدی.
«افغانستان آزادلیک جبهسی» نینگ ایتیشیچه، اَیریم سابق حربيلر طالبان قییناقلری آستیده هلاک بۉلگن، اَیریملری اېسه قماقدن آزاد اېتیلگچ وفات اېتگن. ینه بیر قِسمی آزادلیککه چیققنیدن سۉنگ آغیر کسللیک حالتیده یاتیبدی.
طالبان حاضرگه قدَر «افغانستان آزادلیک جبههسی» نینگ سابق حربيلر نینگ اۉلدیریلیشی، حبسگه آلینیشی و قییناققه سالینیشی حقیدهگی حساباتیگه مناسبت بیلدیرمهگن.
سۉنگّی تۉرت ییل ایچیده طالبان سابق حکومت نینگ حربيلری و منصبدارلرینی محکمهسیز اۉلدیریش و اۉزباشیمچهلیک بیلن حبسگه آلیشده کېنگ مقیاسده عیبلنیب کېلینماقده.
افغانستاندهگی بیرلشگن ملتلر تشکیلاتی نینگ یاردم ادارهسی (یوناما) هم اۉز حساباتلریده سابق منصبدارلر و حربيلرگه نسبتاً صادر اېتیلگن قطار قاتللیک، حبس و قییناق حالتلرینی حجتلشتیرگن.
سابق حربيلرنینگ اۉلدیریلیشی، طالبان افغانستاننی اېگهلهگنیدن کېین عمومي عفو اعلان قیلگن و اونگه رعایه قیلهیاتگنینی دعوا قیلهیاتگن بیر پیتده صادر بۉلماقده.
