بیرلشگن ملتلر تشکیلاتی ترقیات دستورینینگ ایتیشیچه، بو جریان اساسن ایران و پاکستاندن کېلماقده و اوّلدن ضعیف بۉلگن، اۉنلب ییللیک بېقرارلیک و سۉنگّی طبيعي آفتلر عاقبتلری بیلن کورهشهیاتگن مملکت اوچون بحرانلرنی کوچهیتیرهدی.
اوشبو تشکیلاتنینگ قۉشیمچه قیلیشیچه، قَیتهیاتگنلرنینگ کۉپلری کم ملک یاکه جمغرمهگه اېگه بۉلیب، مملکتگه یېتیب کېلهدی، او یېرده یشش جایی یاکه عایله و اۉزینی باقیش اوچون ایش تاپیش امکانیتی یۉق.
بیرلشگن ملتلر تشکیلاتینینگ ترقیات دستوری، بو معمانی شرقي افغانستانده حل اېتیش اوچون اولر افغانستان مخصوص امانی فوندینی (استیافای) مالیهلشتیریب، قَیتیب کېلگنلرگه یاردم بېریش بۉییچه بیر نېچته تشکیلاتلر بیلن بیرگهلیکده برقرار یېچیملر لایحهسینی عملگه آشیرماقده.
مذکور تشکیلاتنینگ گزارشیگه کۉره، اوشبو بیرگهلیکدهگی لایحه مهاجرلر اوچون دایمي و اوزاق مدتلی یېچیم بۉلیب، اولرگه عادتي حیات کېچیریش، کمچیلیک و کۉپینچه مهاجرلیک بیلن باغلیق بۉلگن کمسیتیشلردن خالی یشش امکانینی بېرهدی.
مهاجرلرنینگ قَیتیشی، اقلیم اۉزگریشی بحرانی و گلابل یاردملرنینگ کمهییشی بیلن افغانستاندهگی بشری بحران ینه-ده آغیرلشماقده.
جهان آزیق-آوقت دستورینینگ ایتیشیچه، بو قیش موسمیده۱۷ میلیوندن آرتیق کیشی آغیر آزیق-آوقت خوفسیزلیگی معماسیگه دوچ کېلهدی و آچلیک همده تۉییب آوقتلنمسلیک درجهسی ینه-ده چوقورلشهدی.
