افغانستان بۉییچه امریکانینگ سابق مخصوص نمایندهسی زلمی خلیلزاد، کابلگه سفری چاغیده طالبان تشقی ایشلر وزیری امیرخان متقي بیلن اوچرهشیب، ملاقات اۉتکزدی.
طالبان تشقی ایشلر وزیرلیگی بوگون (یکشنبه، ۷ جدی) اعلان قیلگن بیاناتیده اوشبو اوچرهشووده طالبان و امریکا اۉرتهسیدهگی مناسبتلرنی رواجلنتیریش یۉللری، امکانیتلری و معمالری محاکمه قیلینگنینی بیلدیردی.
وزیرلیککه کۉره، امریکا افغانستاندن چیققنیدن سۉنگ، طالبان بیلن قۉشمه ایالتلر اۉرتهسیدهگی مناسبتلر عملده ینگی باسقیچگه کیرگن.
بیاناتده ایکّی تامان اۉرتهسیده کۉپلب ساحهلرده مناسبتلرنی رواجلنتیریش امکانیتلری موجود اېکنی و بو بارهده دایمي ملاقاتلر آرقهلی ایش آلیب باریش ممکنلیگی قید اېتیلگن.
طالبان تشقی ایشلر وزیرلیگی بیاناتیگه بناءً، خلیلزاد افغانستاندهگی خوفسیزلیک و ترقیاتنی آلقیشلهگن.
شونینگدېک، او طالبان و امریکا اۉرتهسیدهگی ملاقاتنی مهم دېب بهالب، ایکّی تامانلهمه اوچرهشوولرنی دوام اېتتیریش ضرورلیگینی تأکیدلهگن.
زلمی خلیلزاد حاضرچه کابلگه سفری و طالبان تشقی ایشلر وزیری بیلن اوچرهشووی یوزهسیدن هېچ قندهی ایضاح بېرمهگن.
طالبان نینگ افغانستانده ینه حاکمیتنی قۉلگه آلگنیدن بېری، بو خلیلزادنینگ کابلگه قیلگن تۉرتینچی آچیق سفری حسابلنهدی.
او اۉتگن ییلنینگ میزان آییده هم سعوديه عربستانیگه تېگیشلی بیر کمپنی رهبری بیلن بیرگه کابلگه تشریف بویوریب، طالبان رسميلری بیلن اوچرهشوولر اۉتکزگن اېدی.
جناب خلیلزاد اوّلراق ایکّی بار آدم بولر، امریکانینگ گروگه آلینگنلر مسألهلری بۉییچه مخصوص وکیلی بیلن بیرگه کابلگه باریب، طالبان رسميلری بیلن امریکالیک محبوسلرنی آزاد قیلیش مسألهسیده مذاکرهلر آلیب بارگن.
