طالبلر تشقی ایشلر وزیری امیرخان متقی، افغانستان و تاجیکستان چېگرهسیدهگی سۉنگّی هجوملر بۉییچه جدّي تېرگاو باشلنگنینی معلوم قیلدی.
او بوگون (شنبه، ۶ قوس) کابلدهگی بیر مراسمده تاجیکستان تشقی ایشلر وزیری بیلن علاقهده بۉلیب، بیرگهلیکده بوندهی واقعهلرنینگ آلدینی آلیش اوچون ایشلشهیاتگنی حقیده معلوم قیلدی.
متقینینگ قۉشیمچه قیلیشیچه، طالباننینگ خواطری شوندهکی، اَیریم مغرض گروهلر اولرنینگ تاجیکستان بیلن مناسبتلرینی بوزیب، وضعیتنی بېقرار قیلیشی ممکن. او، شونینگدېک، طالبان قۉشنی دولتلر بیلن همکارلیک قیلهیاتگنینی و افغانستان توپراغی هېچ کیمگه ضرر یېتکزهدیگن مقصدلرده ایشلهتیلمسلیگینی تأکیدلهدی.
افغانستان و تاجیکستان چېگرهسیدهگی منطقهلر یقینده بیر نېچه خوفسیزلیک واقعهلریگه گواه بۉلدی. اېنگ سۉنگگیسیده، تاجیکستان ملي خوفسیزلیک کمیتهسینینگ اعلان قیلیشیچه، اۉتگن سهشنبه کونی ترورچیلر افغانستان توپراغیدن اۉتیب، ختلان ولایتی، شمسالدین شاهین اولسواللیگیده قاواق حدودیگه کیرگن. اوشبو عملیات دوامیده اوچ نفر ترورچی و ایکّی نفر تاجیکستانلیک عسکر اۉلدیریلگن.
بو هجوم افغانستان توپراغیدن تاجیکستان چېگرهسیدهگی حدودلرگه سۉنگگی بیر آی ایچیده صادر بۉلگن اوچینچی قوراللی هجوم بۉلدی. شو بیلن بیرگه، اوّلگی هجوملرده افغانستان توپراغیدن چیققن هجوملرده بیر نېچه چین لیک هم هلاک بۉلگن اېدی.
تاجیکستان ملي خوفسیزلیک کمیتهسی نینگ تأکیدلشیچه، بو هجوملر طالبان نینگ ترورچی گروهلری بیلن کورهش بۉییچه اۉز مجبوريتلرینی بجرمهگنینی کۉرستماقده.
