«حالوش» اخبارات آژانسینینگ خبر بېریشیچه، ایراننینگ سیستان و بلوچستان ولایتیدهگی زرآباد اولسواللیگیده ایران ترتیباب کوچلری تامانیدن اۉققه توتیلیشی عاقبتیده بیر افغانستانلیک هلاک بۉلگن.
مذکور یېتکرمهگه کۉره، ایران ترتیباب کوچلری تیناوون کېچقورون (پنجشنبه، ۴ جدی) تعقیب دوامیده اوشبو افغانستانلیک نینگ موتریگه اۉق اوزگن و او بیر نېچه اۉقدن جراحت آلیب، واقعه جاییده وفات اېتگن.
«حالوش» نینگ یازیشیچه، هلاک بۉلگن افغانستانلیک نینگ اسمی غدیر بۉلیب، او تخمیناً 55 یاشده بۉلگن.
خبرگه کۉره، غدیر اویلنگن، بېش فرزندنینگ آتهسی بۉلگن و ایراننینگ سیستان و بلوچستان ولایتی، زرآباد اولسواللیگیده یشب کېلگن.
حاضرچه ایران حقوق-ترتیباب کوچلرینینگ اوشبو افغانستانلیکنینگ موتریگه نېگه اۉق اوزگنی سببی نامعلوملیگیچه قالماقده.
ایران رسميلری و عاموی اخبارات واسطهلری حاضرگچه اوشبو آتیشمه و افغانستانلیکنینگ اۉلدیریلیشی یوزهسیدن ایضاح بېرمهگن.
سۉنگگی آیلر دوامیده ایراننینگ چېگره حدودلری و باشقه منطقهلریده خوفسیزلیک کوچلرینینگ اۉق اوزیشی عاقبتیده بیر نېچه افغانستانلیک هلاک بۉلگن.
تخمیناً بیر آی آلدین ایران چېگرهچیلری تامانیدن فراه ولایتی بیلن چېگرهداش حدودلرده کمیده 10 نفر افغانستانلیک اۉلدیریلگن اېدی.
طالبان اوشبو حادثهلر بۉییچه تېرگاو اۉتکزیشنی طلب قیلگن، بیراق حاضرگچه اونینگ نتیجهلری اعلان قیلینمهگن.
