اېراننینگ دوغارون اېرکین تجارت-صناعت زونی اقتصادي رواجلنیش بۉییچه اۉرینباسری حسین نوریزادهنینگ ایتیشیچه، اوشبو تجارت منطقهسیده فعالیت یوریتهیاتگن ایچکی و تشقی سرمایهدارلر ۲۰ ییلدوامیده سالیق تۉلهشدن آزاد اېتیلهدی.
ایرنا اخبارات آژانسینینگ خبریگه کۉره، نوریزاده، شونینگدېک، افغانستانلیک سرمایهدارلر بو حدودده فعالیت آلیب باریش اوچون ویزه آلیشگه محتاج اېمسلیگینی بیلدیرگن.
اونینگ قۉشیمچه قیلیشیچه، دوغارون اېرکین تجارت-صناعت زونی تشکیلاتی سوداگرلر و اقتصادي فعالیت یوریتووچیلر اوچون فعالیت رخصتنامهلرینی بېریش جریانینی آلیب بارماقده همده دولتی ایش یوریتیش جریانلرینی اېنگ کم درجهگه توشیرگن.
ایرانلیک اوشبو رسمینینگ ایتیشیچه، دوغاروندهگی اقتصادي فعالیتلر ایران و افغانستان اۉرتهسیدهگی مناسبتلرنی رواجلنتیریشده مهم رۉل اۉینهیدی.
او افغانستان بازارینی ایراننینگ بو مملکت بیلن سودا المشینووینی آشیریش اوچون مهم امکانیت دېب بهالهگن و دوغارون چېگرهسینینگ هراتگه یقینلیگی، مدني یقینلیکلر همده افغانستانده ایران محصولاتلرینینگ کېنگ ترقهلگنلیگی افغان سوداگرلرینینگ ایران محصولاتلریگه بۉلگن قیزیقیشینی آشیرهیاتگنینی تأکیدلهگن.
طالبان افغانستانده ینه حاکمیتنی قۉلگه کیریتگنیدن سۉنگ، ایران اوشبو مملکتگه اېنگ ییریک تاور اېکسپورت قیلووچی دولتگه ایلنگن.
سۉنگگی آیلرده، اینیقسه طالبان و پاکستان اۉرتهسیدهگی کېسکینلیکدن کېین، ایران و طالبان اۉرتهسیدهگی تجارت همده اقتصادي علاقهلر ینه-ده کوچهیگن.
