ایران تشقی ایشلر وزیرلیگی امریکانینگ تیناوون کېچقورون اوشبو مملکتگه اویوشتیرگن هجوملریگه مناسبت بیلدیریب، بو هجوملر «نهفقط بیرلشگن ملتلر تشکیلاتی نظامی و دولتلرنینگ قطعنامهسی همده حدودي یخلیتلیگینی حرمت قیلیشگه عاید خلقارا حقوق نینگ اساسي قاعدهلرینی قۉپال روشده بوزهدی، بلکه -۱۹-حمل سنهسیدهگی صلحنی هم عملده معناسیز قیلیب قۉیدی»، دېب بیانات بېردی.
وزیرلیک بوگون (پنجشنبه، ۲۱-جوزا) اعلان قیلگن بیاناتیده اوشبو هجوملرنی «قطعي قارهلشی»نی بیلدیریب، «بو تجاوزکار حرکتلردن کېلیب چیقهدیگن اۉته خوفلی عاقبتلر اوچون جوابگرلیک امریکا حکومتی نینگ ذمّهسیده بۉلهدی»، دېب تأکیدلهگن.
ایران تشقی ایشلر وزیرلیگی شونینگدېک، امریکا نینگ اَیریم منطقه دولتلری حدودی و امکانیتلریدن ایرانگه قرشی حربي عملیاتلرنی تیارلش و عملگه آشیریشده فایدهلنیشده دوام اېتهیاتگنی بو دولتلرنی هم «تجاوزکار تامانلر» قطاریگه قۉشهیاتگنینی بیلدیرگن.
بیاناتده ایران «منطقه دولتلری نینگ امریکا اوردوسی نینگ اۉز حدودی، امکانیتلری و منبعلریدن ایرانگه قرشی تجاوز اوچون فایدهلنیشیگه یۉل قۉیمسلیک بۉییچه قانوني و اخلاقي مجبوريتلرینی اېسلهتگن حالده، امریکا و اونینگ اتفاقچیلری نینگ حربي تجاوزیگه قرشی قانوني مدافعه حقوقیدن فایدهلنیش دایرهسیده هجوملر منبعینی ضررسیزلنتیریش قطعیتیگه اېگه اېکنینی» قید اېتگن.
ایران تشقی ایشلر وزیرلیگی بیرلشگن ملتلر تشکیلاتیگه اعضا دولتلر، بمت خوفسیزلیک کېنگشی و بمت باش کاتبیدن امریکا هجوملرینی آچیقچهسیگه قارهلشنی طلب قیلیب، «امریکا و صهونستیک رژیم نینگ قانونبوزرلیگی همده زۉروانلیگیگه نسبتاً سکوت و حرکتسیزلیک دنیانی ینه-ده کۉپراق ترتیبسیزلیک و بېقرارلیک سری آلیب بارهدی»، دېب تأکیدلهگن.
امریکا صلح اعلان قیلینگنیدن بویان کېتمه-کېت ایکّینچی کېچه ایراندهگی تورلی نشانلرگه ضربهلر بېرگن.
ایران نینگ اسلام انقلابی قۉریقچیلری (سپاه پاسداران) اېسه بو هجوملرگه جوابن منطقهدهگی امریکا حربي بزهلریگه ضربه بېرگنینی معلوم قیلگن.
شونینگدېک، خاتم الانبیا مرکزي قوماندانلیگی ایران جواب چارهسی صفتیده هرمز بۉغازینی تۉلیق یاپیشینی اعلان قیلگن.
امریکا ایراننی هرمز بۉغازی اوستیده اوچهیاتگن « آپاچی» توریدهگی حربي تیک اوچرنی اوریب توشیریشده عیبلهگنیدن سۉنگ، ینگی هجوملر تۉلقینینی باشلهگن.
بو هجوملر تامانلر ۱۹-حملدن بویان صلحگه رعایه قیلهیاتگنینی بیلدیرگن و پاکستان واسطهچیلیگیده یکوني کېلیشووگه اېریشیش اوچون خبر المشهیاتگن بیر پیتده صادر بۉلماقده.
