طالبانگه قرشی جریانلر، تهرانده افغانستان سابق ایکّی حربیسینینگ اۉلدیریلیشیگه جوابن، اوشبو واقعه بۉییچه تېرگاو اۉتکزیلیشینی طلب قیلگن و ایران حکومتیدن، افغانستانلیک قاچقینلر اینیقسه سابق حربيلرنینگ حیاتینی حمایه قیلیشنی سۉرهگن.
بیرلشگن ملتلر تشکیلاتیده افغانستان نمایندهلیگینینگ سرپرستی نصیراحمد فایق، سابق یوقاری مرتبهلی حربيلر جنرال اکرامالدین سریع و محمد امین الماسنینگ تهران مرکزیده قتل قیلینیشینی «تشکیلي جنایت و جدّي آگاهلنتیریش» دېب اتهگن.
فایق شونینگدېک، سابق حربيلرنی حتی قاچقینلیکده هم اۉلدیریش دوام اېتهیاتگنینی و جنایتچیلرنینگ تۉلیق حمایهگه اېگه اېکنینی ایتگن.
اونینگ قۉشیمچه قیلیشیچه، «اوشبو جنایتگه قرشی سکوت سقلش، اونگه شریکلیک دیر. بیز اوشبو حرکتنی قتّيق قارهلهیمیز و تېزکار، شفّاف تېرگاو همده جنایتچیلر و بویروق بېرووچیلرنی جوابگرلیککه تارتیشنی طلب قیلهمیز».
«افغانستان آزادلیک جبههسی» طالباننی بو ایکّی سابق حربينی اۉلدیریشده عیبدار دېب بیلگن. بو گروه «سابق افغانستان حربيلرینی اۉزی نینگ ناقانوني و نا مشروع حکمرانلیگیگه قرشی بالقوه تهدید صفتیده کۉرهدی و سۉنگگی تۉرت ییل ایچیده اولرنی تعقیب قیلیش، تهدید قیلیش، قتل قیلیش و یۉق قیلیش یۉلیده هېچ قندهی جغرافیه، دیني، اخلاقي و حقوقي چېگرهلرنی تن آلمهیدی».
اوشبو جبهه ایران حکومتیدن خلق ارا موازین، اسلامي قدریتلر و انساني مجبوريتلریگه موافق، «سابق افغانستان حربيلرینی حمایه قیلیش، جنایتچیلر و اولرنینگ بویروق بېرووچیلرینی انیقلش و قانون دایرهسیده جزالش بۉییچه تېزکار و ثمرهلی چارهلر کۉریشنی» سۉرهگن.
«افغانستان آزادلیک جبههسی» شونینگدېک، ایران حکومتیدن سابق حربيلرنی افغانستانگه چیقریش جریانینی تۉختهتیشنی طلب قیلگن، چونکه ایشانچلی و حجتلشتیریلگن معلوماتلرگه کۉره، طالبان چیقریلگن حربيلرنی حبسگه آلیش، قییناققه سالیش، یۉق قیلیش و اۉلدیریش عملیاتینی عملگه آشیرهدی.
اوشبو جریان بیرلشگن ملتلر تشکیلاتیدن هم اۉزینینگ حقوقي و اخلاقي مسوولیتلری اساسیده سابق افغان حربيلرینی ایراندن اوچینچی خوفسیز مملکتلریگه تېز و خوفسیز کۉچیریشنی تأمینلشنی سۉرهگن.
«افغانستان ملي قرشیلیک جبههسی» هم بیر اعلامیه نشر قیلیب «بو بیرینچی مرته اېمسکی، مملکتیمیزنینگ نفوذلی حربي و خوفسیزلیک شخصلریگه ایران اسلام جمهوریتی توپراغیده مقصدلی قاتللیکلر اویوشتیریلماقده. اوشبو فاجعهلی واقعه خلقیمیز، اینیقسه قاچقینلر آرهسیده چوقور غضب و خواطر اویغاتدی».
اوشبو جبهه ایران حکومتیدن جدّي، شفّاف و مستقل تېکشیروو اۉتکزیشنی و جنایتچیلر، رېجهلشتیرووچیلر و قۉللب-قوّتلاوچیلرنی انیقلب، عدالت آلدیده جواب بېریشینی طلب قیلگن.
اسلامي جمعیت حزبیراۉز بیاناتیده اکرامالدین سریع و محمد امین الماس نینگ اۉلدیریلیشینی «جدّي خواطرگه سبب» دېب اتهگن.
اوشبو حزب: «ایران اسلام جمهوریتی تېگیشلی و صلاحیتلی اۉرگانلری بوندهی قاتللیکلرنی عملگه آشیرگنلرنی انیقلشی و اولرنی قانون و عدالت قۉلیگه تاپشیریشی کوتیلهدی».
جنرال اکرامالدین سریع، سابق تخار پولیسی قوماندانی، و باشقه بیر سابق حربي تیناوون کونی تهراندهگی ولی عصر میدانیده اۉق اوزیش نتیجهسیده قتل قیلینگن.
هجوم نینگ انگیزهسی حاضرچه نامعلوم بۉلیب، ایران رسميلری هم بو مسأله بۉییچه ایضاح بېرمهگن.
اوشبو واقعه بیر نېچه آی آلدین اسماعیلخان بیلن یقین بۉلگن سابق جهادچی قوماندان نینگ مشهد شهریده اۉلدیریلیشی بیلن صادر بۉلگن.
سابق حکومتنینگ بیر قِسمی حربي و رسميلری طالبان حاکمیتگه کېلگنیدن کېین ایرانگه قاچیب اۉتگن.
اېران بعضی سابق افغانستان حربيلرینینگ یشش مدتینی اوزهیتیرگن. شو بیلن بیرگه، ایران تامانیدن افغانستانگه چیقریلگن باشقه سابق حربيلر طالبان تامانیدن حبسگه آلینیب، بعضاً قتل قیلینگن.
