طالبان نینگ امر به معروف و نهي از منکر وزیرلیگی سۉنگّی اوچ آی دوامیده مملکت بۉیلب بېش مینگ۷۸۱ نفر روحي کسللیگی بار شخص انیقلنگنینی معلوم قیلدی.
وزیرلیکنینگ ایتیشیچه، اوشبو شخصلر دوالنیش اوچون قیزیل یریم آی جمعیتیگه تنیشتیریلگن.
طالبان رهبری روحي کسللیگی بۉلگن شخصلرنی ییغیب آلیش بۉییچه بویروق بېرگن. بو فرمان نینگ مقصدی صفتیده ضعیف قتلملر نینگ روحي سلامتلیگینی تأمینلش، جمعیتده روحي کسللردن کېلیب چیقیشی ممکن بۉلگن خوف-خطرلرنینگ آلدینی آلیش و اولرنی دوالش اوچون شرایط یرهتیش کۉرسهتیلگن.
حاضرچه طالبان تامانیدن ییغیب آلینگن شخصلر قندهی شرایطلرده سهقلنهیاتگنی نامعلوم.
طالبان اوّلراق افغانستان شهرلریده تیلنچیلرنی ییغیب آلیش بۉییچه کېنگ کۉلملی کمپنی باشلهگن اېدی. بیراق قشّاقلیک و ایشسیزلیک نینگ کوچهییشی یانیده، هنوزگچه مملکت شهرلریده کۉپلب آدملر تیلنچیلیک قیلیشده دوام اېتماقده.
بیر نېچه اۉن ییللیک اوروش و بېقرارلیک سببلی، روحي کسللیک افغانستانده کېنگ ترقهلگن معما حسابلنهدی. بېمارلرنینگ اکثریتی ساغلیقنی سقلش خدمتلریدن فایدهلنه آلمهیدی. اَیریم آغیر روحي خستهلیککه چهلینگن شخصلر اېسه جوده آغیر و ناچار احوالده یشهماقده.
