طالبان عالي محکمهسی عیاللر و اېرککلرنی عامه آلدیده شلاقلش حکمی اجرا اېتیلگنینی بیلدیردی
طالباننینگ عالي محکمهسی باميان و کاپیسا ولایتلریده تۉرت نفر عیال و بېش نفر اېرکککه نسبتاً عامه آلدیده شلاقلش جزاسی اجرا اېتیلگنینی معلوم قیلدی.
محکمه نشر قیلگن بیاناتگه کۉره، بوگون (شنبه،۲۹ قوس) باميان ولایتی مرکزیده «نامناسب مناسبتلر» و «زنا» عیبلاولری بیلن ایکّی عیال و ایکّی اېرکک عامه آلدیده شلاقلنگن.
طالبان عالي محکمهسی نینگ بیلدیریشیچه، بو شخصلردن ایکّی نفری۱۵و ۳۵درّه بیلن جزالنگن همده آلتی آیلیک اجرا اېتیلهدیگن قماق جزاسیگه حکم قیلینگن.
محکمهنینگ قۉشیمچه قیلیشیچه، ینه ایکّی نفر شخص هر بیری۳۵ درّه بیلن جزالنگن و بیر همده ایکّی ییل مدتگه اجرا اېتیلهدیگن قماق جزاسیگه حکم اېتیلگن.
طالبان عالي محکمهسی ینه بیر بیاناتیده اۉتگن هفته چهارشنبه کونی کاپیسا ولایتینینگ حصهی اوّل کوهستان تومنیده «نامناسب مناسبتلر» عیبی بیلن ایکّی عیال و اوچ اېرکک عامه آلدیده قمچیلنگنینی معلوم قیلگن.
محکمه معلوماتیگه کۉره، اوشبو شخصلرنینگ هر بیری۳۹ درّه بیلن جزالنگن.
طالبان افغانستان اوستیدن قَیته حاکمیتنی قۉلگه آلگنیدن بېری، عیبلنگن شخصلرنی بیر نېچه بار عامه آلدیده قمچیلهگن.
شونینگدېک، بو گروه حاضرگچه یوزلب تماشابینلر اشتراکیده و مملکت استدیونلریده۱۲ کیشینی قتل اېتگن.
طالبان تامانیدن جسماني جزالر و قتل حکملرینینگ اجرا اېتیلیشی کېنگ کۉلملی تنقیدلرگه سبب بۉلگن. خلق ارا انسان حقوقلری تشکیلاتلری بونی انسان قدر-قیمتیگه و خلق ارا قانونلرگه ضد، دېب بهالهماقده.
بیرلشگن ملتلر تشکیلاتی و انسان حقوقلری تشکیلاتلری طالباندن عیبلنگن شخصلرگه نسبتاً جسماني جزالر و قتل حکملرینی درحال تۉختهتیشنی طلب قیلگن.
